Manipur state sorkari longkak aitba sentongtem anema ozüng tasen ka yanglutsü

Imphal, May 31 (Agencies): Manipur nung lokti balalai longkak aitba aser mokdangba sentongtem ayongzüka akaba nokdangtsü nükjidong nung yashi nikongtsütsü state cabinet-i ozüng tasen ka yanglutsü asoshi asadangogo.
Iba Cabinet senden ya Chief Minister, N. Biren Singh lenisüba kübok agia liasü. Parnoki iba senden nung lokti balala ajanga mapangshia state nung longkak aitba aser mokdangba sentongtem ayongzüka akaba ajanga nüburtem kangshidaktsüba onük nung tatsü talang asatepa mapang talangka lemtepogo.
Cabinet-i Kerala, West Bengal aser Meghalaya nung High Court-i iba amala sentongtem anema ozüng agüja aliba asadanga liasü aser longkak aitba aser mokdangba sentongtem ya ozüng alema inyakba maparen ka kümdaktsütsü asoshi ozüng tasen ka yanglutsü lemtetogo. Maneni parnoki iba amala sentong ayongzüka oset balala raksaba aser nüburtem nem timtem agütsüba ajak sentong ayongertem dak tongloktsütsü asoshi telemtetba agiogo.
Iba ozüng tasenba nung longkak aitba aser mokdangba sentong ayonger nem iba amala sentong nung teraksa aluba ajak menokdaktsütsü asoshi ozüng ka inoksemtsü asadangogo. Iba den külemi sentong ayongertem mesüra nisung shirnoksa iba amala sentong nung densema aitsüdir, sorkar mapa nung mapa magütsütsüba aser sorkar scheme balala kübok kecha teyari magütsütsüba den külemi ozüng alema inyaker ka ama okadak obendangtsü asoshi item ozüngtem inoktsü asadangogo.