Manipur State Transport tentettsü

Imphal, April 30 (April 30): Manipur Cabinet-i Manipur State Transport (MST) tentettsü atema telemtetba agiogo aser taruba ita ka tsüngda bus service tenzüktsü.
Chief Minister N Biren Singh-i anir Cabinet senden ka amendang Manipur State Transport tentettsü aser tetenzüklen Transport Department-i ketdangsüa reprangtsü atema telemtetba agi, ta Manipur sorkar ketdangser kati ashi.
Iba maparen nung MST kübok private operator temia shilem agitsü. Maparen tetenzüklen MST-i lenmang 14 nung senzütsü. Lenmangtemji Imphal den Churachandpur, Pherzawl, Bishnupur, Jiribam, Noney, Tamenglong, Kangpokpi, Senapati, Ukhrul, Kamjong, Thoubal, Kakching, Chandel aser Tengnoupal district tem sendakteptsü.
Manipur nung lendenlen aliba district tem nung lenmang temesü aser gari anendak tesem peria meliaka, gari aser lenmang nung senzüsenbonger onsara kümogo aser iba ajanga küm piyong traffic timtem ajurur. Iba khuret atema Cabinet-isa Imphal telongtet nung traffic ketdangsüa reprangtsü atema Superintendent of Police (Traffic) aser Additional Superintendent of Police (Traffic) mapatem tentettsü lemtet.
Tawa Manipur nung cyber crime kanga bulua atalokba atema Cabinet-i iba dak sendakba ken o tem ketdangsütsü atema Deputy Superintendent of Police mapa tasen ka shimtsü Cabinet-isa telemtetba agi.