Manipur tatar senden nungi NPF tatar 4 anen

Dimapur, Sept.06 (TYO) : Manipur tatar senden nungi yakanü September 4 nü NPF MLA 4 parnoksasa anenogo.
Item NPF MLA pezüji Mao constituency nungi adoksang L.Dikho, Ukhrul constituency nungi adoksang Samuel Rison, Chandel constituency nungi adoksang ST Victor Nunghlung aser Karong constituency nungi adoksang Dr.V. Alexander Pao nungertem liasü.
Parnoki ashiba agi, Manipur nung Ibobi Singh-i aniba sorkari tribal nisung aser talisa Naga nunger anema tanen maka kanga mejungi inyaka aoba ajanga tatar senden nungi anener.
Parnokisa ashiba agi, tang Manipur tatar senden nung latetba Protection of Manipur People Bill, 2015, Manipur Land Revenue and Land Reforms (Seventh Amendment) Bill , 2015, Manipur Shops and Establishments (Second Amendment) bill 2015 aser ano Naga yimten tebilemtsü latettsü atema India den yimjung ken o renemba anema pangzüng renemba ajakji Naga nunger anema inyakba mapatem asüba agi parnok iba tatar senden nungi anener.
Item Naga nunger NPF tatartemi Manipur angh, India tir, centre sorkar, Naga yimten ken o jembir, arogo, lokti tentet lenirtem aser nübortem dang Manipur nung Ibobi Singhi aniba sorkari tribal nisungtem anema renemba pangzüng ozüngtemji nokdangtsü asoshi külemi inyakdaktsüner ta mepishia metetdaktsüogo.