Manipur teloktemi ‘Framework Agreement’ anema lungkak aiter

Imphal, Chiteni (July) 27 (Agencies): All Manipur United Clubs Organization (AMUCO), United Committee Manipur (UCM) aser Committee of Civil Societies Kangleipak (CCSK)-i Naga Agreement anema Chiteni (July) 31 ayaterm nungi Luroi (August) 1 ayaterm tashi state ajunga mokdangtsü ayogzükogo.
India sorkari telemsa adokdaktsütsü atema mapa inyakba anema parnoki iba mokdang ayonger.
Kwakeithel nung aliba AMUCO office nung tanü osangbener den jembidang Naga Peace Accord ajanga Manipur litsü nung mekongshidaktsütsü atema parnoki lungkak aitba sentong balala agitsü ta joint body-i metetdaktsü.
Chiteni (July) 28 nü Keishampat Leimajam Leikai Community hall nung mender lungkak aittsü aser Luroi (August) 18 nü Manipur nunger taginüba atema lokti sentong ka agitsü, ta lennirtemi ashi.
Prime Minister aser joint body nungi lennirtem tsüngda senden amendang Centre nung lennirtemi Manipur dang framework agreement ajanga onok litsü nung mekongshitsü ta ashi, saka tawa RN Ravi-i Parliamentary Standing Committee nem osang agütsüba nung India Linük Temzüng nung Arrla 371A tangalen amshitsü akok ama shia lir, ta AMUCO tir, Deban-i ashi.
Arrla 371A ajanga Nagaland state nung civil aser criminal justice ketdangsübaren nung Naga customary law amshitsü tashi talila agütsür.