Manipur tensaji Congress sorkar tai ajanga lir: Kiren Rijiju

Guwahati, January 11 (Agencies): Bodhbarnü Guwahati nung Union Minister of State for Home, Kiren Rijiju-i, tang Manipur nung tzüzüng ozüng tensa mejungi alibaji Congress-i aniba sorkar tai ajanga lir, ta ashi.
Paisa, tzüzüng ozüng benoka tensa azüoktsüji temzüng kübok state sorkar teinyaktsü lir, ta ashi.
Assam nung BJP-i aniba teloktep sorkari ayongba sentong ka nung adenba sülen osangbenertem den jembidang Rijiju-i Manipur sorkar aser longkak aiter, United Naga Council (UNC) naprongla dang state nung election timi junga agitettsü asoshi rongsenkettsüng lenmang mokdangba agiendaktsüner, ta mepishi.
Manipur sorkari Naga nunger jenti aliba tesemtem lemdanga Sadar Hills aser Jiribam nem district jenjang agütsütsü lemtetba anema November 1 nü UNC-i mapang telatet ka makai Imphal-Dimapur (NH 2) aser Imphal-Jiribam (NH 37) highways mokdang tenzüka liasü.
Rijiju-i, “Hopta ana tejaklen ni Manipur semdangogo aser Chief Minister Okram Ibobi Singh den senden tajung ka menogo. Centre sorkari tiyongtsüi ia state sorkar den lenmang ajak nung yariteptsü mulunga dang lir, ajisüaka tzüzüng ozüng benoka azüoktsüji temzüng kübok state sorkar teinyaktsü mapa lir, ta ashi.
“Manipur maneni mokdangbaji tia maka, koba ajanga nüburtem nem timtem agütsür. Ni UNC danga mener ken o jembitsü mepishir, koba ajanga timtem aser onüktem bentettsü,” ta minister-isa ashi.
“Iba den külemi ni state sorkar danga iba tensa tamajungba mekümdaktsütsü mepishir. Meimchir timtemba nungi yimtenren tsütsü tajangzük agitsü atema asenoki mebilemli,” ta paisa shisem.