Manipur University ken o atema HRD ketdangser aru

Imphal, Aami (June) 22 (Agencies): Manipur University nung vice-chancellor agienang ta takhangba agüja lungkak aitba sülen HRD ministry Joint secretary, G C Hosur yashi Imphal tonga arur ken o angadangdar.
Manipur Chief Minister, N Biren Singh-i Union HRD Minister, Prakash Javadekar den phone ajanga jembiba sülen Hosur yashi Imphal-i aru.
“Manipur University nung mepetmesü adokba atema ni HRD Minister Prakash Javadekar den jembiba sülen Joint secretary HRD Ministry Imphal-i arur kü den ajurutepogo. Künati tang Manipur University nung adoka aliba ken o lemsatep” ta Biren Singh-i Facebook nung metetdaktsü.
Tanü joint secretary Hosur-i Manipur University Students’ Union (MUSU) ketdangpurtem den ajurutep.
“Onok executive züngsem pezüi tanü joint secretary den ajurutep aser idangji onoki VC-i tim mesüi inyakba osang metetdaktsüogo. VC memelen tashi university shibanga atatsü telemtetba onoki pa dang shiogo” ta MUSU tir Dayaman Mayanglambam-i ashi.
Tanü agi anogo 24 buba tashi kaketshirtemi VC melenang ta takhangba agüja lungkak aityonga arur.
Manipur University nung mapa meinyaktetba atema university nung Dean 6 tashi parnok mapa nungi anentsü shidi agütsüogo.
“Lungkak aitba ajanga University nung timtem bener aruogo anungji lungkak aitba anenang ta Joint secretary-i onok dang ashi. Onoki pa dang Pandey (Adiya Prasad Pandey) VC menden nungi agien nung dang anentsü ta langzü” ta MUSU tirisa metetdaktsü.
Manipur University Staffs’ Association (MUSA)-i tanü kaketshirtem pusema lungkak aitba sentong ka agi.
MUSA-i vice-chancellor dang kaketshirtemi tai tongloktsüba nung ajemdaker mapa nungi anentsü takhangba agütsü.