Manipur University: MUSU-i maneni longkak ait tenzükogo

Imphal, Rongjui/September 6 (Agencies): Manipur University Students’ Union (MUSU)-i tanü nungi tenzüka vice-chancellor, Adya Prasad Pandey anema longkak aitsü sangdongogo. Manipur nung aliba kaketshirtem varsity nung ken o mebenteti aliba ajanga timtem ajurua aliba mapang ka nung tang MUSU-i iba osang sangdongogo.
Anogo 84 tashi Manipur University mapa minyaki lemtar aliba sülen varsity nung lokti tentet balala, state government aser Centre tsüngda tenangzüktepba ka agiba sülen khen atema anena liasü.
Luroi/Aug 2 nü nungi anogo 30 leave nung toktsüba sülen Rongjui/Sept 1 nü Pandey-i pa mapa tanaben belenzükba osang metetdktsü. Kasa anogo pai Manipur University Act 2005, statute 3(4) nung ajemdaker Manipur University Teachers’ Association (MUTA) aser Manipur University Staffs’ Association (MUSA) nem tenokdangba agütsü.
Iba sülen Rongjui/Sept 3 nü varsity chancellor, Dilip Nachane temelaba agir Manipur University registrar (in-charge), Sh. Dorendrajit-i Pandey anema ken o benoka aliba mebentet tashi pa leave nung toktsütsü asoshi telemtetba agia metetdaktsü.
Sangtennü osangbenertem den sensaksemba mapang Pandey-i ashiba agi, pa leave dak sendakba nung HRD ministry nungi pa nem kecha osang magütsü.
Pandey-isa, HRD ministry-i inquiry committee tentettsüba pai magizüker ta shia, committee mendenbuba ya MUTA züngsem ka indang adianu lir ta ashi.
Rasemnü MUSU office nung osangbenertem den sensaksemba mapang general secretary, Laishram Kennedy-i ashiba agi, Pandey aser registrar (in charge) M. Shyamkesho na ya tekolok meshidak aser tena ya Manipur nunger anemer lir.
Paisa, “Pandey-i Luroi/Aug 16 nü tenangzüktepba anema jembiaka Chief minister N. Biren aser tanga ketdangsertemi Pandey anema mejembitetba ya tia maka ulura,” ta ashi.
MUSU-i chief minister aser council of ministers tem iba tenangzüktepba yangluba mapang dena alirtem parnok mapa nungi anentsü asoshi shiogo, kechiyong parnok lenir asütsü asoshi metemsü, ta ashi.
Kaketshir lokti tenteti CVO aser kaketshir lokti tentet balala aser nüburtem dang state nung aliba nüburtem anema inyakba atema Pandey aser Shyamkesho anema jenjang tapet agitsü asoshi mepeshi.