Manipur University nung kaketshir aser tesayurtem apuba aitsür: AHRC

Imphal, Mongputeni (October) 3 (Agencies): September 20 aser 21 ayaterm nung sepaitemi Manipur University boys’ hostel mita aoba atema temerenshi agütsütsüla ta Asian Human Rights Commission (AHRC)-i metetdaktsü.
Manipur University nung ayaterm nung kaketshirtem aser professor tem apubaji police-i tashiyim mapa inyakba, timtemdaktsüba, freedom of expression aser freedom of assembly anema lir, ta AHRC-i ashi.
Manipur University nung kaketshirtem timtemdaktsüba aser apuba osang AHRC-i angazükogo aser iba atema UN Special Rapporteur dangi shidi ka züluogo, ta parnokisa shisem.
AHRC-isa parnok indang website nung National Human Rights Commission mendenbuba Justice H L Dattu aser Union Home Minister Rajnath Singh ama ketdangsertem dangi shidi zülutsü atema format ka renema lir.
Centre aser State sorkartemi kaketshirtem anema tashiyim mapa inyakba atema mapa inyaktsüla ta AHRC-isa takhangba agütsü.