Manipur University nung tesayur aser kaketshirtem chiokogo

Imphal, Mongputeni (October) 17 (Agencies): Manipur University mepetmesü atema police-i kaketshir 21 aser professor 6 apuba Mongulbar nikongtsütsü chiokogo.
Kaketshirtem rongnung par 9 ji Manipur University nungi lir ta osang ka ajanga ashi.
Imphal East district nung aliba Sajiwa Central Jail anasa kaketshir aser professor kinungertemi parnok pelaa agizük.
Iba sülen palace compound nung aliba Lamyanba Sanglen nung kaketshir telok 6-i parnok pela agizükba sentong ka ayonga agi.
Manipur University nung university tesayur 6 aser kaketshir tenet September 20 aser 21 ayaterm nung police-i University hostel tem mita aodang apu. Tanüngba kaketshirtemji lungkak aitba mapa apu.
October 11, 2018 nü Manipur University nung Administrator inyaktsü atema Manipur High Court-i taoba state chief secretary Jarnail Singh shimba sülen iba mapa inyakogo. Jarnail Singh-i Vice Chancellor indang mapa inyaktsü.
Jarnail Singh-i mapa agizükba sülen tasüng Manipur University nung telok balala den ajurutep. Paisa Imphal nung taoba Pro-Vice Chancellor K Yugindro den ajurutep.
Jarnail-i taoba mapang Prime Minister atema joint secretary mapa inyakogo.
Yugindro-i university nung lungkak aitertem anema FIR ka benokba sülen police-i nisungtemji apu. Jarnail-i pa den ajurutepa jembidang teinyaktsü kar nung ajemdaker ken o ji meyipa agitsü mulung.
Yashi anüngdang Manipur chief Minister N Biren Singh-i Imphal nung sentong ka nung jembidang tesayurtem aser kaketshirtem yakta chioktsü ta metetdaktsü.
Sorkar aser kaketshir telok trok tsüngda Memorandum of Understanding ka yasüng ayaterm nung agiogo, ta pai ashi.
Sorkar ya nübortem atema inyakba sorkar ka lir aser olemteptsü atema sorkar indang kishi lapoka dang lir. Manipur University nung tensa yakta süngjemtsü imlar, ta Biren-isa ashi.