Manipur University Vice-Chancellor nem sodi agütsü

Hokolbarnü Manipur Chief Minister Nongthombam Biren Singh-i Imphal nung osangbener senden ka nung jembidang agiba noksa angur. (Imphal, August 3)

Imphal, Luroi (August) 3 (Agencies): Manipur University nung Vice-Chancellor Prof A P Pandey yashi nungi tenzüka ita ka atema sodi agütsüogo ta ketdangsertemi ashi.
Manipur University nung Department of Life Sciences nung Prof W Vishwanath Singh-i anogo 30 tashi Vice Chancellor inyaktsü atema shim.
Manipur Chief Minister N Biren Singh-i Manipur University Students Union, Manipur University Teachers Association, Manipur University Staff Association aser public dang shisaliok reju nung inyaksangshia aotsü atema lungkak aitba anentsü atema mepishia metetdaktsü.
Manipur University nung kaketshirtemi ita ana jungnüa Vice-Chancellor Prof A P Pandey mapa nungi anentsütsü aser pa anema bushisüngdang asütsü atema takhangba agüja lungkak aityonga arur.
Union HRD Ministry-i VC nem sodi agütsübaji mulunga agizükogo aser parnoki “state sorkari law & order tensa mejungi akümtsü ta tsübua bilem aser iba jagi Union HRD Ministry dang Pandey nem sodi agüja atatsü asüngdang” ta metetdaktsü.
Union HRD Ministry-i telemtetba agiba atea Manipur Chief Minister-i pelaba metetdaktsü.
Central University nung lateta aliba ama MU nung senior most professor-i officiating VC ama inyaka atatsü, ta Biren Singh-isa ashi.
Central University ka asünung, state sorkari indangindang teka aita meinyaktet aser iba jagi mapang agi, ta paisa shisem.
Taoba ita University Grants Commission (UGC)-i Pandey-i junga ketdang masüba aser senotsü timi mamshiba ken o tem bushisüngdang asütsü atema luden ka tentet.