Manipur yimten teloktemi state litsü kümzüka ayutsü

Imphal, October 29 (Agencies): Manipur chief minister N Biren Singh-i party ajak senden ka ayonga amendang Centre dang Manipur litsü kümzüka ayutsü atema ashitsü bangzünga renem.
Centre aser Naga telungpur teloktem tsüngda yimjung olemtep tatembanglen kati aruba mapang ka nung Manipur sorkari iba takhangba agütsüshiogo.
State sorkari tentetba consultative committee-i Delhi nung iba onük den sendaktepa alirtem ajak den ajuruteptsü. Iba luden ya deputy chief minister Y Joykumar Singh lenisüba kübok lir, ta Manipur chief minister’s secretariat ajanga metetdaktsü.
Manipur litsü kümzüka ayutsü atema Prime Minister Narendra Modi nem tezüluba ka agütsütsü.
Taoba mapang Manipur assembly-i par state litsü kümzüka ayutsü atema telemtetba aika agia lir.
Naga telungputemi akhangba ‘greater Nagaland’ nung Manipur, Assam, Arunachal Pradesh aser Myanmar nung Naga nunger aliba litsütem dena lir.