Manipur yimtiba nung mobile internet nokdanger

New Delhi, December 18 (Agencies) : Manipur yimtiba Imphal nung Meitei nunger ta temulung melemi bilemba telok kati tenla ki ka amakba aser Khristmas benjung aser Deobar tekülem sentong magidaktsütsü ta amokmerenba sülen Deobarnü state sorkari Imphal nung mobile internet services shibangtsü tetuyuba agütsüogo.
State sorkari tensa tamajungba mekümdaktsütsü aser olulu osangtem prokba nokdangtsü atema mobile internet services shibangtsü. Iba tenokdangba ajanga nübortemi WhatsApp, Hike, Viber, Facebook amala mamshitettsü. Ajisüaka, mobile internet shibangbaji nisung aikati magizüker.
Naga nungertemi rongsenren tenokdangba agüja lungkak aitba anema Meitei nungeri tenla kiji amakba liasü.
Iba tenokdangba ya taküm November ita nungi tenzükba liasü.
India nung mobile internet nokdangba ya tang tasen masü aser mapang shia Jammu & Kashmir nung iba timtem ajurur. Arrtsülen aliba J&K mesra Manipur nungdang masü saka Gujarat nunga tenokdangba agüja liasü aser ibaji tatidang nung ajizükepba nokdangtsü atema liasü.
October 31, 2016 tashi nung India nung mobile mesüra tanga internet 46 ben tashi nokdanga liasü. Bihar, Maharashtra, Arunachal Pradesh, Haryana aser tanga state aika nung iba tenokdangba agüja liasü.
US nung amenoka aliba Brookings Institution ajanga ashiba agi, India nung internet shibangba ajanga takoksa jenti angu.
2015-16 tsüngda India nung internet shibangba ajanga $968 million (sen crore 6,485) akoksa aser ibaji 22 ben nokdangba ajanga liasü, ta Brookings Institution-i metetdaktsü.
Brookings Institution-i linük 19 nung internet nokdangba indang bushiba nung takoksa teimba angubaji India linük liasü ta bushitet.