Manipur:Congress MLA ana BJP nung denogo

Imphal, October 17 (Agencies) : State assembly election atongtsü anasa tesüiba mapang kilonser aser Congress lenir tejen, Y Erabot-i party toktsür BJP nung adenba sülen ano Okram Ibobi Singh-i aniba sorkar nung taoba mapang Congress MLA ana Hombarnü nungi Bharatiya Janata Party (BJP) nung denogo.
Opposition party nung adensang anaji Heingang constituency nungi asemben tashi adokba, taoba mapang Irrigation & Flood control minister Nongthombam Biren aser Tadubi constituency nung Congress ticket nungi anaben adoksang, taoba mapang rural development minister den portfolio aika benloka alisang, Francis Ngajokpa na lir.
“Ni tang yimsü tesüdak sorkar nungi anener, kechiba süra parnoki ki bilema inyakba yimya nung yimsü asür,” ta October 6, 2016 nü Congress nungi MLA menden toktsüsang minister N Biren-i ashi.
“Iba den külemi, Manipur nung lokti ajak atema terenlok bener arua, tang adoka aliba ongdang mesemtsü atema ni BJP nung adener,” ta pai shisem.
Taoba mapang minister Francis Ngajokpa-i October 13, 2016 nü pa mapa nungi anentsü atema shidi agütsü aser pai, “Constituency ajungtsü aser ajungkettsü atema ni BJP nung adener,” ta ashi.
Party worker tem Imphal nungi kilometre 80 shi pilar aliba Maram jila nung tawa senden ka amendang Ngajokpa-i party nungi anen nung dang nungittsü lemtet.
Tena pela agizükba sentong tajung ka BJP state office nung Hombarnü ayonga agiogo. Iba sentong nung Party atema national secretary, Ram Madhav, NE in-charge Ajay Jawal aser state Tir Kh Bhabananda nunger den BJP nungi MLA tem Th Biswajit aser Kh Joykishan nungera aden.
Tena jakdang September 12, 2016 nü Wangkhei constituency nungi MLA mapang talangtiba inyaksang, taoba mapang food & civil supplies minister Yumkham Erabot-i party toktsür BJP nung adenba sülen ano Congress MLA Dr Kh Loken aser taoba mapang speaker Budhichandra’er jabaso Dr Sapam Ranjan-a BJP nung oa züklok.
Pela agizükba sentong nung Assam nungi health & education minister Hemanta Biswas Sharma-i, “asen tesem nung terenlok bener arutsüji BJP nükjidong lir,” ta ashi.
Paisa, 2017 küm assembly election agiba sülen Manipur nunga BJP yimsüsüba arutsü kanga temulung alemer, ta ashi.