Manisha Koirala-i cancer atema app ka lapoktsütsü

January 14, 2016: Nu menden Cancer tashidak nungi kümzüker alila, Bollywood actress Manisha Koirala-i cancer nungi kümzüka alitsü aser iba tashidak agi kangshia alirtem yaritsü asoshi mobile app ka lapoktsütsü.

“Ni cancer tashidak nungi jilia kümzüka alitsü aser iba tashidak agi kangshia alirtem yaritsü asoshi app ka lapoktsütsü,” ta Brihostibarnü Patna nung osangbenertem senden ka nung Manisha-i metetdaktsüogo.

Grameen Sneh Foundation ayongba temang aliyim sentong ka nung adentsü aruba mapang lai iba osang metetdakja liasü.

Lai ashiba agi, küm aika iba tashidak tsütsü nüburtem kanga anisaa aruogo.

Cancer ya mapang shitak nung putetra noklang nung shilem 99 kümzüktsü lenmang lir, ta ashiba mapanga lai, “Cancer agi shiranger aika dang tetuyuba tai agütsüba den cancer tettsübutsü aketba shia aruogo. Ni lapoktsütsü aliba app ajanga item tetsübutem ageintsütsü,” ta ashi.

Iba Foundation nung Tir Sneha Routray-i, iba app ajanga temang, tekolok aser temulungsentsü ajak nung cancer den raratsü asoshi terenlok agütsütsü, ta ashi.