Manjhi-i MLA menden toktsüba sülen HAM Tir shimogo

Patna, August 25 (Agencies): Bihar assembly election agitsü mapang ana nung lia JD(U) party toktsüsang aser taoba state Chief Minister, Jitan Ram Manjhi-i tanü state assembly züngsem nungi ainshiba sülen ghonda ishika tsüngda pa Hindustani Awam Morcha (HAM), Secular nung National Tir shimogo.

Patna nung aliba hotel ka nung HAM (Secular) national representatives senden nung senior party lenir aser taoba mapang agriculture minister, Narendra Singh-i party nung national Tir atema Manjhi shimtsü benoka liasü, aser ibaji züngsemtemi agizük, ta HAM (Secular) otongdar Danish Rizwan-i ashi.

Tepela o jembidang taoba Bihar CM Manjhi-i, Bihar nung mepong melenshidagi ta ashiba den külemi NDA tashii arutsü asoshi party nung külem lenirtem aser inyakertem ajaki kanga meranga inyaktsüla, ta ayongzük.

Ita ka-ana tsüngda Bihar assembly election agitsü. Züngsem 243 aliba Bihar assembly November 29, 2015 nü tembangtsü.

Manjhi-i, secular teloktep party tem nungi lenirtemi tashii arutsü atema caste politics asayar ta ashiba den külemi tang tashi nung aliba sorkar agientsü asoshi pa lenisüba nung HAM (Secular)-i ajak lungjemdaktsütsü atema inyaksü, ta ashi.

NDA teloktep nung aliba party- LJP aser RLSP-i tekaraba nung menden alemtsüla ta khangdar, aser iba dak sentakba nung taoba chief minister-i, teloktep nung tena aliba party ajaki iba onükji tim sabang nung jembitsüla, ta ashi.

Tanep Manjhi-i legislative assembly acting secretary, Hare Ram Mukhiya ajurua pa nem MLA nungi anenba shidi ka agüja liasü.

Trokben tashi MLA arishi küm 70 Manjhi-i JD(U) ticket nungi Jehanabad district, Makhdumpur (SC) menden nungi takok ngua liasü.

Yaküm May 20 nü Manjhi Chief minister menden asoshi tenangüzkba agiba sülen ita teku shitak lir taküm February 20 nü pai office tokja liasü, aser iba sülen pai yimtenren party tasen- Hindustani Awam Morcha (HAM) tentet, iba sülen tesüsa NDA nung aden.