Manmarziyaan dak sendakba nung Kashyap-i ken o jangjashitsü

Rongjui/September 19, 2018 (Agencies): Manmarziyaan film nung Abhishek Bachchan cigarette ka chia adokba ajanga Sikh nungertem mepelaba osang angazükogo aser iba dak sendakba nung film yanglur Anurag Kashyap-i ken o jangjashitsüogo.
Temetettsükaji iba film nung Abhishek-i Sikh nunger Robbie shilem agir. Film nung moko achiba shilem ajanga Sikh nunger aika temulung yirutsüogo aser ashiba agi iba shilem ajanga alima tsüngda par kin noksa tamajung sayur.
Rasemnü Kashyap-i Twitter ajanga iba osang jangjatsüogo. “Iba film ajanga lokti ka indang jembir masü saka kija taküm aser parnoki taküm nung pei aotsüba lenmang shimba indang jembir. Manmarziyaan ya nisung asem kija taküm otsü lir aser iba ya tamangba yimsü dak kecha sendaka mali,” ta pai ashi. Maneni paisa par team-i film yangluba mapang nung Sikh nunger dang nungi jenjang ajak nung ken o ashishia inyakba rasaa ashi.
“Onok gurudwara nung shilem ka tangokba mapang onok dang kibong akümba scene metangoktettsü ta ashi kechiyong kibong akümbaji temeshi lir aser aji pongba pongba magir anungji actor tem ‘mattha tekna’ dang südaktsü. Onoki scene tangokba mapang nung crew tem shinga ki telung nung moko achitsü asoshi memela,” ta paisa ashi.
Moko achiba scene indang jembidang arishi küm 46 tain film yangluri ashiba agi, “iba scene ya yimtong nung tangok aser nisung 150 shi-i repranga liasü. Onoki parnok dang asüngdanga aser pa moko machi tsüngda Turban agizüktsüla ta ashi. Maneni onok dang Robbie-i koda teka anaprongla amshia turban agizüktsüla aser pa adianui koma turban meshitsüla, item ajak sayua liasü. Sentepa aliba lokti rongnung timba ka Sikh nunger liasü aser parnoki koda inyaktsü aji tetuyuba agüja liasü.”
Kasa mapang film crew pelashishi agizükba atema pai Amritsar nung aliba nüburtem tenüng asang. “Ni Sikh nunger temulung yirutsütsü asoshi inyakba masü aser nüburtemi onok dang ita temeim sayua kodaser onoki parnok temulung yirutsütsü. Tamangba yimsü kechaia mapa tamajung inyaktsü mesayur saka iba amala maparen ya odang ataloker. Ajisüaka parnoki tamangba yimsü anemer masü,” ta pai film indang character tem indang ateshia ashi.
Iba scene indoktsü asoshi akhangertem dang pai ashiba agi, “techonology ajanga scene cut asütsü asoshi memelar aser iba ajanga otsü raksatsü. Anungji ni ibajibo minyaktettsü.”
Maneni pai tweet tatem nung film nung scene ajanga yirur aliba nüburtem dang tatok meshi.