Manmohan nem Indira Gandhi Peace Prize agutsütsü

New Delhi, November 19 (Agencies): Taoba Ato kilonser, Manmohan Singh nem Indira Gandhi Prize for Peace, Disarmament & Development award agütsütsü, aser iba ya 2004 küm nungi 2014 küm tashi nung pa lenisüba nung India linük alima jenjang nung ajungkettsüba atema agütsür4.
Indira Gandhi Memorial Trust sangdong ka ajanga ashiba agi, taoba Tir, Pranab Mukherjee leniba nung international jury senden ka amendang iba award ya Manmohan nem agütsütsü lemtet liasü.
Yashi Trust’s secretary Suman Dubey-i sangdong ka ajanga, “Manmohan Singh-i küm 10- 2004 küm nungi 2014 küm tashi linük anidang pai rongsenkettsüng aser loktiliba atema mapa tajung inyaka India alima jenjang nung züngokdaktsüba aser kidanger linüktem aser alima nung tashi aliba linüktem den tesendaktep yangluba, iba den külemi pai tamangba yimsü, kinkidong mesüra oshiopen telemsa kecha makai senso ajak nem security agüja kasa züngshiba atema pa nem Indira Gandhi Prize for Peace, Disarmament & Development award agütsür,” ta metetdaktsü.
Kasa sangdong ajanga, Ato kilonser anabenren kümsük tembanga inyaker Ato kilonser tasembubaji Manmohan lir, ta metetdaktsü. Indira Gandhi nüngtem nung International award ya 1986 küm tenteta liasü