‘Mann Ki Baat’ ajanga kibong shia nung ni züngsem ama kümogo: PM

New Delhi, May 28 (Agencies): Ita shia Ato kilonser, Narendra Modi-i radio ajanga linük nüburtem den jembiba sentong dak sendakba nung tanü pai, küm ana tejaklen iba sentong tenzük, aser iba sentong ya ajanga linük nung kibong shia nung pa kibong züngsem ka amai kümogo, ta ashi.
Tanü ‘Mann Ki Baat’ sentong ajanga jembidang Modi-i, “Nisung kari ‘Mann Ki Baat’ ya onük ka ama agir aser karibo yimtenren tsütsü nungi aitsür,” ta ashi.
Opposition party temi, Modi-i iba sentong ajanga pai inyaknüba dang jembir, saka nüburtem taginüba olabo mangar, ta aitsüba dak sendakba nung pai iba o ya jembi.
‘Mann Ki Baat’ sentong ya 2014 October ita nung tenzüka liasü. “Iba sentong ya ajanga ni kidang mener kibong züngsemtem den jembir ama ni bilemer,” ta Ato kilonserisa ashi.
Minute 30 sentong nungsa pai nüburtem dang alima kümzüka ayutsü aser merükmejua alitsü ayongzükba den külemi yoga indang aser nüjiso atema rarartem indanga jembia liasü.
“Tajunglen agi aitsüba ajanga asen democracy tashi itshidaktsür. Nüburtemi onok mapa junga asadanger ta meteta ni pelar. Sorkari nüburtem nem telangzüba agütsütettsüla. Ni ibaji pelaa agizker,” ta paisa ashi.
Muslim nunger den Ramzan salem lemsatepdang pai, linüki nüma atangtsüla, kechiyong India nung tamangba lokti ajak tesünep nung liteter, ta ashi.
“India nunger sobaliba balala aser lokti balala külemi litetbaji asen tashi lir; alima nung tamangba yimsü balala nungi India nunger crore 125-i tesünep aser telongjem osang prokba atema nüma atanger,” ta paisa shisem.