Manny Pacquiao, Horn den masayatsü

Brisbane, September 2 (Agencies): Philippines nunger nüngtugu boxing asayar Manny Pacquiao-i world champion Jeff Horn den tanaben asayashitsüba aliba asaya nung shilem magitsü ta Hokolbarnü metetdaktsüogo aser iba ajanga Horn pa title defend asütsüba atema tanga asayar ka bushidar.
Iba osang ya Queensland state government ajanga sangdonga liasü. Tena tsüngda asaya November ita 12nü asayatsüba renemer liasü.
“Sentong yanglur aliba ama mesüi Manny Pacquiao November 12nü masayatettsü ta osang agütsüogo,” ta Queensland Premier Annastacia Palaszczuk-i metetdaktsü.
“Mr Pacquiao ya Philippines Senator ka lir aser pa iba mapang nung tanga mapa aliba ajanga shilem magitettsü,’ ta laisa ashi.
July ana nü asaya nung Australia nunger asayar yagi alima ajunga aoksadakja Brisbane nung Pacquiao madak takok ngua liasü.
Iba sülen mangatettep aliba ajanga World Boxing Organization-i iba asaya tanga judge karnem reprangshidaktsü, kong parnoki Horn-i round tenet akok ta ngutet.