Manny Pacquiao-i pa tatembang tsüngtepba nung takok nguogo

Las Vegas, April 10 (Agencies) : Manny Pacquiao-i küm 21 tsüngtepa arur tan Las Vegas nung pa tatembangba tsüngtepba nung Tim Bradley madak takok nguogo. Iba takok ma nung pa tsüngtepba nungi anisüngzüker.
Yaküm May ita “Fight of the Century” nung Floyd Mayweather madang tamakok angusang, Pacquiao-i Bradley anaben tashi laoa atsüng aser iba sülen point reprangtepba nung pai akok.
MGM Grand Garden Arena, Las Vegas nung Pacquiao-i welterweight tarensen kübok world champion, arishi küm 37, Bradley den kanga ayim ayima tsüngtepa liasü. Pacquiao-i card asemprongla senteper 116-110 agi Bradley madak takok angu.
Tan tsüngtepba zünga Pacquiao-i pa tsüngtepa aruba mapang 66 ben tsüngtepogo aser pai iba ya pa asoshi tatemsa tsüngteper ta metetdaktsüogo. Iba sülen Philippines nung oa taruba ita election nung shilem agitsü tebilemba lir, ta pai metetdaktsü.
Aji oda süaka tsüngtepba sapua repranger aikati pai ano tsüngtepnütsü, ta shia liasü.
Na joko anisüngzüktsü bilemer asü, ta asüngdangdang pai, “Kü tebilemba ibaji lir. Ni ozü kibong dang tan tsüngtepba sülenbo anisüngzüktsü nangzükogo. Ni anisüngzüker jangratema nüburtem tenzüka aser yaria alitsü jangrar,” ta langzüba sülen pa sapurtem dang tatem o kar ashi.
“Tsüngtepba sapur ajak dang kanga pelar, balakata Philippines nunger ajak dang kanga pelar. Nenoki ni nungita yariba atema kanga pelar,” ta pai ashi.
“Bradley ya tsüngteper tajung lir. Pa ya teburji aser champion ka lir. Taonung pa den tsüngteptsü kanga melara masü asü,” ta tena azüteptsü anasa Pacquiao-i ashi.
Iba sülen tena külemi breakfast achitsü bangjemer senshi.
“Ni taonung kanga junga tsüngtep, ajisüaka ni kechi asüar memetet,” ta Bradley-i ashi.
“Pa teti tesem shitak nung liasü. Pa kü dang nungi mera ka agi tekaraba liasü. Pai ajangshia aruba ajak amshia ni akok…ni khenyongi nisung balaka, Manny Pacquiao, den tsüngtep,” ta Bradley-isa ashi.