Manohari Gold süngojok seret 1 Rs 50,000 agi ayok

Dibrugarh, July 30(Agencies): Upper Assam nung Manohari Gold Tea seret ka Rs 50,000 agi yokogo.
Mongulbarnü Guwahati Tea Auction Centre (GTAC) nung süngojokji ayok aser public auction ka nung süngojok sen teimba agi ayokbaji iba ya lir.
Sourabh Tea Traders nungi Manjilal Maheshwari-i auction nung sen teimba agütsü. Iba süngojok Dibrugarh nung aliba Manohari Tea Estate nung temechi agi dang yanglur aser tereprangtsü sentsü balaka den tajemtsüa balaka lir.
Iba süngojok dang Manohari Gold ta ajar aser yaküm-a Manjilal-i iba süngojok seret 2 alizüka liasü.
Manohari Tea Estate kibur Rajan Lohia-i ashiba agi “iba süngojok yanglutsüba ya kanga tasak kechiyong süngojokji temechi tilatem agi yanglur. Iba süngojok gram 50 yanglutsü atema anogo ka piyong agir.”
July 2018 nunga iba kasa süngojok ya seret ka nung Rs 39,001 agi yoka liasü, ajisüaka, Arunachal Pradesh nung aliba Polo Tea Estate-i yangluba Golden Needle süngojok agi Manohari Gold süngojok ayokba ajangteta liasü.
August 2018 nung Pan India Auction Sale No 34 alidang Golden Needle süngojok seret kaji Rs. 40,000 agi yokdoka liasü.
Manohari Tea Estate ya Upper Assam nung lir Indian-Burmese arrtsü anasa lir. Iba süngolu ya ali acre 1800 nung lapoka lir aser ali acre 1000 ji süngodong agi sünga lir.
Manohari Tea Estate kibur Rajan Lohia-isa ashiba agi, taküm parnoki iba süngojok seret 5 dang yanglutet.
“Taküm tsüngsang-mopung ajanga Manohari Gold süngojok aika meyanglutet. Iba süngokjok ya P-126 ajanga yanglur aser May o June itatem nung anepdang temechitem agizüker” ta paisa metetdaktsü.