Manokshiba Sorkar Aginer

Centre densema state aika nung Congress aser BJP ama National Party temia party temejai menden peria menguteti party ana-asem mesüra iba dang nungi timba lokteper ang sorkar kümteter. Yamaji tang Nagaland nunga election jakdang NDPP-BJP lokteper toktep (pre-alliance) aser election osang sangdongba sülen NDPP-BJP teloktepi JDU candidate ka aser Independent candidate ka teyari agia ang tanü (Metsüremi 8, 2018) sorkar tenangzükba agiogo. Nagaland nung Indian National Congress aser Naga People’s Front nati kümsük aika yimsüsüa arur tang sorkar tasen ka kümtetdang nüburi sorkar tasenba ya koma ka asütsü? ta imdangjema atar. Nagaland nung alirtemi Congress aser NPF naprong dak tajung-majung chitetogo. Parnok yimsüsüba mapang nung parnoki koba jenjang ka tashi state yangertet’ar nüburi meteta lir. Küm aika party anapronglai Naga yimtenren ken o latettsü atema jembia aruogo, Naga nunger telongjem indang jembia aruogo, state terenlok indang jembia aruogo, saka tanü Nagaland koba jenjang nung aliar nüburtem metet. India Union kübok sorkar kümsükji küm pongu dang asünung küm pongu shia sorkar tasen melentsü mesüra party nüngja melentsüa akok, ajisüaka nisungbo kasa dang süra temelenshi kecha balaka malitsü. Tawa election nung takok angur rongnung tejak tasenpur aika lir, talisa lanur aikati takok anguba ajanga nüburtem nem teimla tasen ka agutsüogo, ajisüaka inyaka aodangang nüburtemi ajung-majung chitettsü. Iba ama mapang ka nung sorkar tasenba jagia asenok asoshi kechisa inyaktsütsü ta tajung imlaseta ataba mapang nung sorkari election mapang “party manifesto” nung nangzüka alibatem mamadoktsüla. Ano külen yimtenren lenirtemi teret mejangi süoshi melener amato party ka nungi kati memeyipshira Assembly nung opposition tashitait alitsü. Tesüiba mapangtem nungbo Assembly nung opposition züngsem ishika dang mesüra mali den kasa liasü, saka tanbo  tsüngsü ania tai pua anidaker aika alitsü; parnoki opposition shilem shidak angateta ola adokra nübur ajangzüktsü aser terenlok alitsü. Joko nüburtemi manokshiba sorkar ka aginer. Nagaland state jenjang ngur joko küm aika, saka asenok dang nungi temonuba state jenjang angurtemi asenok ajateter tejakleni ogo. Asenok joko mapang talangka tesülen kanga atsüngzüka liogo, anungji arisanga lenla ajak nung tangar tsüngsü den meneptepa jajatsü mapang tongogo. Tripura nung tesüiba küm 25 tashi Communist teloki yimsü süa arudang Tripura lima lenla aika nung junga yangertetogo, süra Khristan state ka nungbo koda? ta bilemdanga inyaktsüla. Centre nungibo sen aika yoker, aser ibaji ajaki meteta lir, saka iba jagi state nung mapa shitak meinyakba ajanga alima merenloker aser nübur libaliro jenjang tajungba makümer. Kodang Centre nungi yokba sen agi gari lenmang shidak yangludir, sorkar mozükitem nung facilities shidak ngudir, sorkar school tem nung tanurtem nem chiyongtsü, kaket aser shisaliok tajung agütsüdir, kodang tesayurtem nem itasen aser kaketshirtem nem scholarship mapang shidak nung agutsüdir, teintet sensotem aser lenimaortem nem teyari shidak agutsüdir, light, tzü tajemtsü shidak agutsüba den industry tapu balala lapokja lanurtem nem mapa agutsüdir, idangjiang nüburtemi chichiba terenlok süngjangji chitettsü, aser nüburtemi item anogoji yongyaa atar.