Maoist-i tepsettsü tasa atongba sülen SPG-i PM Modi dang kümdangtsü ashir

New Delhi, Aami (June) 9 (Agencies): Rajiv Gandhi tepsetba ama Maoist temi Prime Minister Narendra Modi pa indang roadshow ka nung tepsettsü tasa atonga liasü ta Pune Police-i osang metetdaktsüba sülen Special Protection Guard (SPG)-i PM Modi dang road show mashie mayongzüktsü atema tebilemba metetdaktsüogo.
Cabinet Secretariat nungi osang ka ajanga ashiba agi, SPG-i iba osang ya par züngsemtem dang jungjunga metetdaktsüogo.
Prime minister anükertem rongnung tongtiba Close Protection Group (CPG) nem osang metetdaktsüogo. Parnoki second ishika tsüngda kiralongrartem khatettsü koka lir.
SPG nungsa Counter Assault Team (CAT) ta ser quick response team lir. Iba telok yagi prangpong-injang tajungtibatem amshir aser training-a kanga junga agia lir. Counter Assault Team-i prime minister amakba mapang mapa inyaker aser parnok danga PM tepsettsü tasa indang osang metetdaktsüogo.
Home Ministry nung Naxal desk-i Pune police den osang agitepdar. “Tang tashi nungbo bushisüngdangji tetenzüker ang lir saka onoki state police dang nungi osang meshiogo” ta police ketdangser kati ashi.
Rajiv Gandhi tepsettsü ama PM Modi tepsettsü tasa atong ta Pune police-i ashi.
Taoba mapang PM Modi-i parnoki ashi manga inyak aser iba atema SPG ketdangsertemi shisabulur.
Republic Day Parade 2018 sülen PM Modi-i gari nung amentsü memulung aser sentepa alirtem den ajuruteptsü atema ao ta SPG ketdangsertemi ashi.
Idangji parnok kanga aoksa saka PM-i telok dak teka ayiplokja senzüdang parnoki pa sülen anidak. Iba mapang SPG nisung anati briefcase tapu ka bener Modi sülen anidak. SPG-i amba briefcase ji foldout ballistic shield ka lir ta osang ajanga ashi.
Prime Minister indang convoy nung armoured BMW 7 Series sedan 2, BMW X5 SUVs 6 aser Mercedes Benz ambulance ka dena lir. Item garitem dak alia security units vehicles aser jammers dena lir. Ano, Prime Minister indang convoy tejakdang aser tsülen Delhi Police Security Staff indang garitem lir. Parnok ajak nem osang metetdaktsüogo ta SPG ketdangsertemisa ashi.
“Prime Minister kümzüka ayutsübaji tongtipangtiba mapa lir. Maoist temi kodanga takok mangutsü tongpang ka rarar. Maoist telungpur inyaksangshi kanga ajema kümdaktsüogo” ta Home Minister Rajnath Singh-ia osang metetdaktsü.
Pune Police-i Brihostibarnü okadak Prime Minister tepsettsü atongba tasa indang shidi ka angu ta metetdaktsü.
Bhima-Koregaon tensa dak sendakba nung nisung pungu apu aser parnok rongnungi nisung ka’er kidang shidi angu ta Pune police-i ashi.
Par punguji Dalit activist Sudhir Dhawale, lawyer Surendra Gadling, activist tem- Mahesh Raut, Shoma Sen aser Rona Wilson nungertem lir aser parnoki CPI-Maoist den tesentaktep liasü.
Shidiji Delhi nung amenoka aliba activist Rona Wilson’er kidang angu ta police-i sessions court nung osang metetdaktsü.