Maoist rara ajanga küm 20 tsüngda nung nisung 12,000 süogo: Sorkar

New Delhi, July 09 (Agencies): Tesüiba küm 20 tsüngda Maoist rara dak sendakba nung nisung 12,000 süogo, aser iba nungjagi asür 2,700 bo security sepaitem lir, ta tanü Home Ministry-i metetdaktsü.
Home Ministry-i renemba statistics ajanga ashiba agi, asürtem rongnungji tai maket nübur 9,300 densema lir, aser parnokji telungpurtemi ‘police nem osang agütsürtem’ ta ser tepsetba mesüra sepai o telungpur na raradang tetsüngda nung asübatem lir, ta ashi.
Ajisüaka tesüiba küm asem nung Maoists dak sendakba rara kanga ajema kümogo.
Maoista rara dak sendakba nung asüba aser sepaitem asüba shilem 25 ajema kümogo aser May 2011 nungi April 2014 den asadangra May 2014 nungi April 2017 tsüngda shilem 42 ajema kümogo, ta home ministry nung ketdangser kati metetdaktsü.
Taküm April ita 24 nü CRPF sepai 25 tepseta liasü, aser ibaji 2010 küm April ita Dantewada nung sepaitem amakba sülenbo tamajungtiba liasü.
Ano külen Maoists telungpur tepsetba shilem 65 agi timka kümogo aser telungpurtem temai adokba shilem 185 timba kümogo, ta ketdangserisa ashi.
Home ministry-i ashiba agi, state 10 kübok district 68 nung Maoist telungpur lir, ajisüaka tang Maoists-i mapa inyakba mapatem shilem 90 bo district 35 nung dang lir.
Maoist tebilemtsü anema raratsü asoshi Centre sorkari ‘National Policy and Action Plan’ tenzüka liasü, aser iba nungji sepai tali kümtsüba den terenlok mapatem densema lir. Iba plan kübok police station 307 tali amenok.
Iba dak alia road requirement plan phase-I kübok gari lenmang kilometer 1,391 yangluogo. Ano Maoist telungpuri timtem agütsüba state 9 nung sen crore 11,725 indoka gari lenmang kilometer 5,412 yanglutsü atema agizükogo.
Tezülen aliba tesemtem nung connectivity atema mobile tower 2,187 amenokogo aser tower 2,882 tang tamenokdak lir.
Iba plan küboksa bank tasen 358 lapok, ATM 752 lapok aser Post office 1,789 lapoktsü atema agizükogo.
Maoist-i timtem kanga mejungi agütsüba district 35 nung sorkari rangloker inyaker.