Maoists anema sepaitemi ‘Operation All Out’ tenzüker

New Delhi, Rongjui/September 06 (Agencies): Tang mezüng Maoists anema security sepaitemi Maoists anema sashia inyaktsü telemtetba agia Maoists nung tongti commander tem anema apusotsü renemogo.
Commander temji Chhattisgarh, Orissa, Jharkhand, Telangana aser Maharashtra states nungi lir.
Maoists-i timtem agutsüba state tem nungi police aser Maoists anema operation aoba security sepaitemi Maoists nung tongti commander anema asalentong yangluogo.
Tang mezüng Ministry of Home Affairs aser intelligence agencies-i Maoists anema tongti commander tem tenüng tarensen renemogo. Iba tarensen nung Maoists tongti lenirtem den parnok noksa aser parnok aliba tesemtem densema lir.
Home Ministry ketdangser kati ashiba agi, Maoists nung commander temji kodanga tesem ka nungdangbo malir saka mapang shia tesem melenshi. Iba ama tensa ka nung parnok aliba tesem jangjatsüji tayongzükba mapa tuluka lir. Ano parnok rongnung kar noksabo menguteter, anungji parnok amajibo jangjatsü asaktsü.
Maoist lenirtem, rongnung Hidma densema lir; Chhattisgarh, Bastar region kübok Sukma nung CRPF sepai 12 tepsetba nung pa densema lir iba denji külemi Chhattisgarh, Darba region nung CRPF sepai 75 tepsetba nung shilem agirtema densema lir.