Maoists aputsü asoshi Jharkhand-i senpet crore 8.69 sangdonger

Ranchi, July 21 (Agencies): Mongolbar nü Jharkhand sorkari sangdong ka ajanga, Maoists telungpur parnok 71 aputsü nung yarir nem senpet ajak senteper sen crore 8.69 agütsütsü, ta metetdaktsüogo.

Maoists 71 ji state nung security sepaitem aiben amakba nung densema lir. Parnok 71 nungji CPI (Maoist) aser CPI Maoists nungi razüka aoba faction People’s Liberation Front of India na nungi lenirtem densema lir.

India nung Maoists telungpurtemi timtem tamajungtiba agütsüba state ji Jharkhand lir aser 2000 küm nungi tenzüka tang tashi nung Maoists telungpurtemi state nung security sepai 500 shi tepsetogo.

Mongolbar nü chief minister office-i sangdong ka ajanga, state home department-i benokbaji Chief Minister Raghubar Das-i agizükogo, ta metetdaktsü.

Telungpur züngsemji apir senpet lakh ka nungi lakh 25 tsüngda tashi nung lir.

CMO sangdong ka ajanga, CPI Maoist central committee züngsem, special area committee züngsem, aser regional bureau züngsem, iba den külemi CPI Maoist nung temaba jenjang asem nung alirtem aputsü asoshi police yarir nem senpet lakh 25 agütsütsü, ta ashi.

Ano CPI Maoists regional committee züngsem ka apuba asoshi senpet lakh 15, zonal committee züngsem ka apuba asoshi lakh 10, sub zonal committee züngsem apuba asoshi lakh 5, commanders area committee apuba asoshi lakh 2 aser local guerilla squads züngsem ka apuba asoshi lakh kaka agütsütsü. Item Maoists lenirtemji Jharkhand nung aliba district 24 nungi 22 nung lir.