Maoists den jembitsü Centre-i melunga lir: Rajnath Singh

Koraput (Odisha), February 19 (Agencies): Hokolbarnü Union Home minister, Rajnath Singh-i, Maoists-i rara anenra parnok den ken o jembitsü Centre sorkari melunga lir, ta metetdaktsü.

Maoists telungpurtemi timtem agütsüba district, Koraput tensa reprangdangba sülen osangbenertem den jembidang Union Home minister-i, “Ni parnok (Maoists) dang rara anentsü aser ken o jembitsü mepishir. Telatetba kecha makai parnoki rara anenra parnok den Centre-i ken o jembitsü melunga lir,” ta ashi.

Democracy inyakyim aliba linük ka nung raratsü atema tesem mali, anungji Maoists-i raraba osettem toktsür ken o jembitsü atema tejakleni arutsüla, ta paisa ashi.

Pai, NDA sorkari welfare aser terenlok scheme aika tenzükogo aser item scheme tem nungi tajangzük agitsü atema Maoists-i raraba oset toktsüsüla, ta ashi.

Maoists telungpur kar tepsetba state Jharkhand aser Chhattisgarh na nung police pusema jembidang Union minister-i, security sepaitemi parnok kümzüktsü atema raratsüsa akumer aser iba mapang nungji telungpurtem tepseter, ta ashi.

Maoists anema rara tajung raraba atema pai Odisha sorkar, state police, ketdangsertem aser paramilitary sepaitem nem tenüngsang agütsü.

“Parnoki kanga junga inyakdar,” ta pai ashi.

Maoists anema operation agiba tensa reprangdangtsü atema home minister-i state semdangba mapang state police, BSF, CRPF nungi tongti ketdangsertem district ketdangsertem den ghonda ana senden amen.

Osang ajanga angazükba agi, Jharkhand aser Chhattisgarh na dak alia Odisha-Andhra arrtsülen-a Maoists tebilemtsü tulu lir.

Tanü iba senden nung Odisha Home Secretary, Asit Tripathy aser Director General of Police (DGP), KB Singh nata denogo.