Maoists-i amakba kanga ajema kümogo: Rajnath Singh

Lucknow/Raipur, August 22 (Agencies): Tanü Union Home Minister Rajnath Singh-i, linük nung Maoists telungpurtemi amakba kanga ajema kümogo, ta ashi.
Tanü Chhattisgarh, Bastar district nung Maoists telungpurtemi amakba mapang STF ketdangser ka kahsetba aser sepai ka yirutsüba dak sentakba nung New Delhi nung osangbenertemi asüngdangba ka langzüdang Rajnath-i, “Item tatalokbatem kanga ajema kümogo,” ta ashi.
Tanep Chhattisgarh, Bastar district nung Maoists telungpurtemi security sepaitem mendanger amakba mapang Special Task Force (STF) ketdangser ka tepset aser sepai ka yiruogo, ta police-i ashi.
Tanep züngia 2:00 ako meta STF sepai telok ka district kübok Darbha tesem nung aliba NH30 nung telungpurtem mita ao.
Tanep telungpurtemi amakba tesemji, 2013 küm May ita Congress lenirtem amakba mapang nisung 31 tashi tepsetba tesem, Jeeram Ghati anasa lir.
Iba tatalokba nung Assistant Platoon Commandant (APC), STF Krishna Pal Singh asü aser constable, Santosh Yadav tera yiru, ta Inspector General of Police (SIB) Deepanshu Kabra-i osangbenertem dang ashi.
Maoists telungpurtemi Jagdalpur nungi Sukma lenmang NH30 nung Totapara yimtsüng anasa süngdong laodaktsüba den lenmang tusar mokdanga lir, ta osang ka angashiba sülen STF sepaitemji iba tesem jagi yoka liasü.
Sepaitemji kilometer asem shi oor yimtsüngji atongtsü lia telungpur aikati parnok dang injang sashia kahloktsü, ta paisa ashi.
Iba sülen telok ana tsüngda ghonda ana shi kahetpba sülen telungpurtemji arem leni jena ao, ta paisa ashi.