Maoists-i Modi aser Fadnavis na tepsettsü asalentong yanglu: Police

Pune, Aami/June 08 (Agencies): Koregaon-Bhima tsüngda rara adokba nung Maoists-i shilem agiba bushisüngdanger police temi Ato kilonser, Narendra Modi aser Maharashtra Chief Minister, Devendra Fadnavis na tepsettsü asalentong yangluba shidi kar ngutetogo, ta tanü Pune nung ketdangsertemi metetdaktsü.
Taküm Aenjeti 1, 2018 nü Koregaon-Bhima rara nung shilem agir nisung pezü noksa police-i sayaogo.
Item shidi rongnung kabo Delhi nung alir activist, Rona Wilson’er kidang angu. Iba ken o nung bushisüngdangba mapang Rasemnü India tesem balala nung nisung pongu apu, aser parnok rongnung Rona densema lir.
Iba shidi nungji Rajiv Gandhi tepsetba yimya nung tepsettsü indang shia lir aser M-4 rifles den injang 400,000 alitsü atema sen crore 8 nüngdakba indang shia lir.
Bushisüngdangertemisa ashiba agi, pua aliba nisung pongu rongnung ka indang laptop nung yamai shia lir, “Modi-i state 15 dak tema nung BJP sorkar junga amenokogo. Yamai dang ora Maoists-i lenla ajak nung timtem ajurutsü.”
Parnokisa Rajiv Gandhi tepsetba yimya mesüka pa indang roadshows nung amaktsü atema jembia lir.
“Iba ya taküm aotsüsa asütsüa akok aser asenoki tamakok angutsüsa lir, ajisüaka onoki benokba nungji o lemteptsüla,” ta shidi ka nung shia lir. Parnok pongu anema Unlawful Activities Prevention Act kübok ken o benokogo, aser Pune court matsüngdangi anir aoba sülen Aami 14, 2014 tashi police ket nung agutsüogo.
Yashi Pune Joint Police Commissioner, Ravindra Kadam-i, “Maoists-i shilem agiba den parnoki iba asalentong ayongertem (Elgaar Parishad) ajungshiba kuli police ket nung teperi lir,” ta metetdakja liasü.
Maoist-i Ato kilonser, Narendra Modi o Maharashtra Chief Minister, Fadnavis na tepsettsü asalentong yangluba osang jungkai adokba sülen linük nung yimtenren party aikati ibaji aitsüogo.