Maoists-i rara anener ken o jembitsüla: Rajnath

Bilaspur (Chhattisgarh), June 18 (Agencies): Maoists telungpurtemi rara anener sorkar den yimjung ken o jembitsüla ta mepishia Honibarnü Union Home Minister, Rajnath Singh-i, telungpurtemi raraba anenra parnoki akhangba onüktem nung o lemteptsü sorkari mulunga lir, ta metetdaktsü.
Narendra Modi-i aniba NDA sorkar küm ana ajungba sentong ‘Vikash Parv’ nung jembidang Rajnath Singh-i, “India nung raratsü atema tesem mali, kechiyong linük nüburtemi ibaji magizüker,” ta ashi.
“Ni Maoists telungpurtem dang rara anentsü mepishir, kechiyong India nung raratsü atema tesem mali. Asenok ken o jembidi. Onoki ken o jembitsü mulunga lir aser nenoki raraba anenra nenok takhangba onüktem nung o lemteptsü mulunga lir,” ta pai metetdaktsü.
Singh-isa, terenlok lenmang nung rara ya tetsükdaktsü tulu ka lir, ta ashi.
Sensakertem aser nüburtem takum jenjang tajungba atema bilemtsürtemi tai maket nisungtem metepseter, ta pai ashi.
“Nenoki tangatetba balaka sülen anidaktsü akok, saka iba tetezüji, nenoki tai maketertem tepsettsü ta masü,” ta pai ashi.
Jammu & Kashmir dak sentakba nung Singh-i, telungpurtemi state arrtsülen adena aittsü merangba shilem 50 ajema kümogo aser iba ya security sepaitemi meranga inyakba ajanga lir, ta ashi.
“Asen arrtsü junga kümzüka lir, aser iba ya security force temi meranga inyakba ajanga lir. Tamalenbo kiralongartemi asen linük telungi mela-mela atsüka aitteta liasü. Ajisüaka tangbo ibaji tamakoktsü,” ta paisa metetdaktsü.