Maoists tebilemtsü atema lenmang bushitsü SC-i tuyur

New Delhi, November 11 (Agencies): Tanü Supreme Court-i Centre sorkar aser Chhattisgarh state sorkar na dang state nung Maoists tebilemtsü atema yimjung lenmang bushiang, ta tetuyuba agütsüogo.
Justices M B Lokur aser Adarsh Goel nati akumba bench-i, iba tebilemtsü atema yimjung lenmang karbosa alitsü, ta sorkar dang ashi.
Chhattisgarh sorkari, November 15 tashi social activist, Nandini Sundar aser tangartem anema kecha meinyaktsü, ta ashiba sülen tanü SC-i iba tetuyuba agutsü.
Chhattisgarh, Sukhma district nung tribal yimtaklir ka tepsetba ken o nung November 7 nü Delhi University Professor Sundar, JNU professor Archana Prasad aser tangartem anema ken o benoka liasü.
Bench-isa, “Onoki nenok (Centre & Chhattisgarh) yaritsü meranger, saka nenoki ibaji süoki ia magir. Iba tebilemtsü atema nenoki yimjung lenmang ka bushitsüla. Onoki nenok mesüra parnok, mesüra kar nem tai metongloktsür,” ta ashi.
Additional Solicitor General, Tushar Mehta-i osang tejangjatem lir aser Sindar densema parnok ajak anema itemji court matsüngdang benoktsüa akok, ta ashi.
FIR benoktsü alibaji November 15, 2016 tashi sota atar, ta bench-i ashiba sülen Mehta-i iba osang metetdaktsüogo.
Desai-i, “Iba tatalokba ya tesüngmangtsüka lir, kechiyong November ita nung nisung tepsetba atema May ita nung state-i aoer activist tem anema ken o benok,” ta ashi.
Ibaji langzüa Mehta-i, tenük kuli dak alia ano kuli aika lir aser itemji November 15 matongdang tezüluba nung agütsütsü, ta ashi.
CBI atema jembitsür Solicitor General Ranjit Kumar-i, court-i yimtenren activist, Manish Kunjam nem security agüjang ta ashi aser state-i pa nem Personal Security Officers ana agütsü, ta ashi.
Paisa, Centre-i pa nem security agütsütsüsa jenjang nung mali, ta ashi.