Maongka Halleluya

Tenüngsang Ken 105 nung Israel nunger otsü ashir aser ken züluri yimya nung anguba ama otsü nung Tsüngrem tsüngnep angu, ibaya Halleluya agi atem. Ibai Tsüngremi Abraham dang nangzük, Isak dang azüngashi aser Yakob den akangshi. Parnok yongsük ishika dang aliba mapang Tsüngremi parnok kümzük. Parnok azükarua alidang parnoki Tsüngrem ozüng amatok.
Pai linük nung ayawara adokdaktsü. Tsüngremi Yosef Ijipi yok aser Pa nübur anitettsü Mosa yok. Tsüngremi parnok dangi ammang yok aser tzü azü kümdaktsü. Parnok akhümbangtsü Tsüngremi mepet yok aser sangwadaktsütsü mi yok. Tsüngremi lung jakmatsü aser parnok nem tzü agütsü. Ken züluri ibai meyipa reprangba Halleluya agi shibang.
Kari maongka dang nungi yimya nung Tsüngrem temelaba angur. Yakobi rem, süngdong aser petinutem atema Tsüngrem tenüng asang saka kodang Yosef anir ao pai ashi, “Item ajak ya Pa anema lir.” Mapang kar nung ken züluri “Halleluyah” ta Tsüngrem tenüng asangtsü mejangra. “O kü nela, nai kechiba tim atemer? Kechiba kü mulung nung na jashir? Tsüngrem dak yimlaang: kechiaser ni pa tanaben asangtsü, kü teyari aser kü Tsüngrem” (T.Ken 42:5).
Tsüngrem meimertem asoshi mapa ajak tajung asoshi inyaker, anungji Khristan kati Tsüngrem tenüng masangtsü kecha temeten mali. Ammang nung Tsüngrem tenüng sangang kechiaser Pai sangwatsür. Tejashi asoshi Tsüngrem tenüng sangang kechiaser Yisui ashi, “Ne tejashi tepela agi melentsü.” Mepet asoshi Tsüngrem tenüng sangang kechiaser mepet manung Pai temeim tongnüsen yoker. Mopung asoshi Tsüngrem tenüng sangang kechiaser iba nung nisung chiri ne den jajanür. Shibai ozüng nung tashi angar, “Kibuba nung pelaang,” Pa tanela nung anüngdang aser aonung minute shia pa/la mulung nung Halleluya lir.