Mapa agi senmang akümtsüla

Tang tashibo asenoki ali senmang indang jembidang ali aser kiojentem ya dang chirnurtemi amangyonga aotsüba senmangtem amai bilemer. Ajisüaka, ali aser kiojen dang nungi jenjang tuluba senmangtem asütsüsa tsüraburtem dang nungi chirnurtemi aser chinurtem nungi semchirsemnurtemi ta amangyonga aotsüba semangtem aika lir. Item rongnungji tsüraburtem dak aketba sempet tajungtem aser tsüraburtemi inyakba mapatem lir. Aji oda, senmang indang jembidang ali aser kiojen tama masü saka tsüraburtem dak aketba sempet aser parnoki inyakba mapatemji tama aser tongtibangba asütsü, kechiyong tsüraburtem dak aketba sempet amshia parnoki inyakba mapatem nungiang ali aser kiojen rongsentemji arur. Atangji, asenokbo tangang shisa tenük saaka tangar jilu ajizüka benshirtem dang asünungji, tsüraburtem dak aketba sempettem amshia inyakba mapatem pei chirnur senmang asütsüsa inyaktetba mapa aikabo mali. Mapa kar tsüraburtem senmang ama küma inyakbaji Tsüngrem tenzükba mapa nung tebuia Tsüngrem tenzük aser par chiria Tsüngrem tenzüker ta asüba nisung kar alitsüa akok. Iba dakji alaka aluyimer takar chirnurtemi alu meyimtetter, tulur chirtemi tulur mekümtetter, yimsüsür chirnurtemi yimsüsür mekümtetter aser shishilembar chinurtemi shishilembar mekümtetter ta asüba tia ka nung asenok lir. Tangar tsümarbo dokan ka tebui lapok nung, ibaji senmang küma par chirnurtemi tuluba tuluba küma shishir. Iba amaji kechi mapa südir süaka  tebui inyakba mapaji chirnur senmang küma tuluba aser tajungba küma inyaka alima nema tajangzük agütsür. Atangji, asenokbo tsüraburtemi tekong lu dang yima aru, anungji tekong lu ayimbaji asenok senmang küma meinyaktettem kechiyong ibaji tajangzük aketba mapa ka masü. Ajisüaka, tanü lanurtemi tanü putu dak apet scientific inyakyim nung tekong lu nungjia ali dak apet alu ayimtsü tenzükra, ibajia tsürabur senmang amangba mapa ka amato inyaka otettsü. Iba amaji tanübo lanurtemi kechi mapa tenzüka odir, ibaji pei kibong senmang akümtsüsa inyaktsübaji tongtibang kümogo. Atangji, asenok teimbaka government mapa inyaker, ajisüaka government mapaji asen senmang küma mamshitet, kechiyong ibajibo takoker aser tetemsürtemi melentepa inyaka aotsü. Ajisüaka, government mapajia asüyonga menden tajung nung mener inyakba mapatemjibo pei senmang ama akümtsüsa chirnurtemi meranga azüngtsüla. Tanübo, akhidang ama masü lanurtemia government mapa nung ita sen tilaka chia taküm piyong alener mekazüner, anungji pei  akok aser pei jangraba mapa inyaktsü asoshi business tapu balala tenzüker. Item ajakji pei kolok nungi adoktsü. Aji oda, tanübo joko nübortem nüngdakba oset tapu balala yanglu tenzüktsü akok mesüra tzümartemi inyakba ama dokan lapoka tangalen nungi oset bener arua ayoktsüa akok. Kodang, alima nung nisungtem nüngdak indang bilemdangdir, nüngdak zünger mezüngma aser mapa inyaker meinyakma züngdangtettsü. Item ajakji asen senmang küma inyaktettsüba mapatem lir. Aji oda, kari yin mapa, kari süng mapa , karibo süoshi yanglur aser karibo chiyongtsü tapu balala adokdaktsür ta asüba mapatem nung kibong ajungai shilem agitsüsa inyakra, item mapatemji asen senmang küma inyaka otettsü. Iba amaji kodang asenoki asen mapa agi senmang küma inyakdir, asenoki memeteti aseni inyakba mapa nung asenok mongin kümer alir aser tazüngertema pei mapa dak aketba shisatsü bushiloka azünger. Iba amaji, kodang business nunga pei inyakba mapaji pei senmang küma inyaka odir, pei mapa nung tetsükdak malui ajak den tesendaktep tajungba küma inyaker. Aji oda, government contractor chir ka contractor aküm nung tebui inyaka aliba mapa kaji melamelaa inyaka otettsü. Ibaji mesüka tanü lanurtemi tenzüka inyakba mapatembo pei chirnurtem asoshi senmang küma tuluba-tuluba inyaka aotsüba nükla aser tangatetba nung tenzüktsüla.