Mapa aser Tenzükba – Luke 10:25-27

Kü kiyonger shiba?
Na ama ne kiyonger meimang. Luke 10:27
Kü kiyonger shiba? Ibaji tasüngdangba tajung lir. Ano ibai jangramatem tasüngdangba ka asütsü akok. Aikati pei kiyonger den metettepa malir. Aikati tenüng memetetter aser ano karibo metetnüaka mali.
Yisui tajung Samaria otsü nung ashiba ya, shirnok asen teyari nüngdaka lir parnokji asen kiyonger lir ta ashir. Pei ama asenoki parnok dang meimtsüla.
Yeriko lenmang nung yirur aliba nisung kechi teyari nüngdaka liasü kasa nüngdakji asen kiyongera nüngdaka alitsü akok. Nisung kar azüngmeyaka kija alitsü akok. Kar tajungshiba o agi anünga alitsü akok. Tasübai temeimer bener oadokba alitsü akok. Kar mapa mengui alitsü akok. Kar jabaso jala kanga tuokrong tia nung alitsüa akok. Miim o jembia, o tutepa jembia senzükba jagi kiyonger den tesendaktep raksar alitsüa akok. Kari osangtajungji magizüki, mamangi alitsü akok.
Tangar yariba tetezü asen lenmang, mapa toktsür tangar yariba lir. Iba nung tebilemtsü tulua alitsü akok. Kodang Tsüngrem temeim asenok mulungjang nung lidir iba jagi tenokdangba ajak ajanga otetter. Pauli ashiba ama, Tsüngrem temeim asen mulungjang nung moshia lira, iba jagi mapa tajung ajak inyaktsü jangradaktsür. Nai ne kiyonger nüngdak ngua lir ma ?
Kotak nung aliba Obala, onok meketa alirtem dang temeim agi langzütsü aser onok mapa nung Ne temeim ajitetdaktsütsü onok dang yariang. Amen.