Mapa aser tenzükba takokba otsü : Mathi 20:17-28

Peisasa ajemalua küma kangki nung asütsüa tashi anga aküm. Filipi 2:8
Sensak tia nungi takar, arem semtu ka nung lia intetba nungi White House – itemji America nunger tulur takok anguba otsü lir.
Asen Kibubai takok anguba bilemdangang: kotak nungi alimai; Tsüngrem achichilen nungi aluyimer tetsü ka aser Bethlehem sung su ka dangi; tetushi nungi tesempa, kangki tasüba dangi! Ibaji ajanga Kibuba Yisui Pa meketa alir ajak tenzüktsü mazüngi inyak. Kana yimtak kiyir benjung nung Pai yangluba yi ajemba bilemdangang, Pai yi tajungtiba benjungi arur ajak asoshi renem; meyi pungu dak tali rem manung amen aser anganüba amtsük aser ango achi, shiranger aika Pai anebtsü; Pai shimtetba ter ana langpang meketa mener takok indang jembi saka parnok Masteri parnok tetsüng shidoktsü. Idangji ajak asoshi tematiba tenzükba mapaji atong: mashi memeteteri Pa dang ayimoktsü, putirtem atala. Pai Lai nungi ashi, tasü mait nütsüngtemi Pa kangki nung kojal agi angen dang jena ao, ajak menen, tsükchirtem menena dena Pai aben!
Ibai asen Kümtetdakba takok anguba otsü lir. Atangji, Pa tasü nungi shia aru aser kotak nung Pa mendeni meyipba atu. Saka Pa telangzüba mission kodang Pai kangki nungi “Ibai renemogo” (Yn. 19:30) ta ayimtenba nung tejangja angatetdaktsü.
Kibuba Yisu, Tanela Temeshi ain ajanga Ne takokbai ni kümzükba tamang aser ajemalua tenzükba dangi aniang. Amen.

You must be logged in to post a comment Login