Mapa inyakba mapang

Asenok mapa inyakba mapang o tsümartem mapa inyakba mapang na ya medemdangra kenyongi balala angutsü aser asenokang parnok dang nungi ajizüka mapa inyakba mapangji amshi nung tajungba ta angatettsü. Alu mapa inyakba nunga reprangdangra, tsümartembo anü tatsük makümdang anepdang aser anü mekonga kümer nikongdang dang inyaktsü aser anüngdang anü tatsük mapangbo kilong nung anisüngzüka kazütsü. Ajisüaka, asenokbo mapa inyaktsü mapang tajungtiba anepdang aser nikongtsütsü alu lenmang nung endoktsü aser anüngdang anü tatsük mapang nung temang ajak raksaa mapa inyaktsü. Atangji, tsümartembo alu nung alir, anungji aluji par yim aser par yimji alu, saka asenokbo yim balaka kümteta alir aser idak nungi jagi dang alui oli adokli asüdang mapang tajung ajak endokmar. Iba jagi asenok mapang aser rongsenren nung memeteti takoksa angur. Asenok ya aluyimer kin saka alu nungi züsentetba agi tebok mesüngtet timtemba kinji asenok lir. Ibai tanü lanurtemi shisadanga, tsümar amaji lenmang nung jajadang mapang tajung melalutsüsa aser alu ayimba ajanga takar küma alitsüsa sobaliba tajung aser tasen bushiteta mapa küma inyaktsüla Ano, shishilembaba mapa nunga tsümartem dang ajizüktsüla aika lir. Item rongnung kaji ayokba aser aliba mapang ya asütsü. Tanü asenoki Nagaland nung tanga district-temji khen toktsür, Mokokchung district nung shishilembaba mapatem ya reprangdangra innüseta mainer amai angutsü. Mokokchung town nungi shir Mokokchung district nung aliba town-tem ajak mamangdang shibangadoker, anungji alimabo mamang saka shishilembaba anenba jagi alima mangmanga kümdaktsür. Atangji, shishilemba dak talir melira tayokertem amajok nung aonung tesü tashi dokan lapoka yua amentsüa nüngdak madoker. Ibaji jungjunga bilemdangra asenoki shishilembadaki aoba ajanga mapang amajok nung meindoktsüsa meinyaktetba ajanga lir. Tsümartem asoshibo anü irr külen aonungang shishilembadak tapu tapu alia shishilembatsü mapang tajungtiba, kechiyong iba jagi parnok anüngdang teinyaktsü ka meinyak shishilembadak mapang meindoker. Ajisüaka, asenok shishilembadak oagi shishilembaba yimya reprangdangra, asenokbo shishilembadaki aotsü süra joko panüjibo tanga mapa kecha meinyaki bazaar nung mapang ajak endoka amonger. Tangar tsümartembo anüngdang alu aser office mapa tema inyaker külenang bazaar leni aotsü aser nüngdakba chiyongtsü aser osettem alitsü. Ajisüaka, asenokbo alu nungi madok dang aser office nungi marudang shishilembadak shibangadoker, anungji mapai moika shishia meyura timtem ajurur. Item ajakji bilemdanga aluyimba aser shishilembadak shishia senzüba ajanga mapa nunga takoksa mangutsüsa tanü putu dak apet mapang amshitsüla. Atangji, akhidang nungi asenok Naga nungertem ya office lapoka yur yangji mapang shitak amshia inyakba sobaliba mali asü. Iba jagi asenoki tang tashi mapang amshiba yimya ya junga mamshitetter. Mapang shitak ka lateta maka nungji kodang saknüdir idangji saktsü, kodang chiyongnüdir idangji chiyongtsü, kodang mapai onüdir idangji aotsü aser kodang mapa inyak anennüdir idangji anentsü. Khen ashitsübo onsara tayong aser anisüngzük ulura, kecha talenba mali aser idangjibosa lapoktsüla aser shibangtsüla mesüra iba mapa yabo atemtsüla ta asüba shisabolu kecha maka. Iba amaji tanü tashi asenoki mapang ya kecha tapayu mali amshia arur. Joko, alima nung shisapuin aser nisungtem kolok agi atongba maparen aika nung tajungba akümtsü aser teimba yanglutettsü aser züsentettsü merangba mapang asünungji, alima nung anüngdang aser aonung maka kümogo. Iba ama putu ka nung asenoka tangar jilu tajung ajizüka anepdang, anüngdang, nikongdang aser aonung ajakji  mapang amajok nung melalui  mapa ajak mapang shitak amshia inyaktsü merangtsüla .