Mapa inyakdak alitsüla

Government mapa nung alirtem pei mapa inyaktsü lemzüktsüba tesem nung lia mapa inyakba ama, asenok aluyimertema akhi putu mapang ama yimtak dang ki o ki na tsüngda jara dang ittepba metsütepa melii, putu tasenba nung yabo asenoka pei ali kimong tasen bushia pei mapa inyakdak alitsüsa senshitsüla. Tang tashi asenok aika akhidang asen tsürabur yimkümertemi mesemtetba kimong nung dang lia asen akhi alu tasener. Ajia junger saka kodang asenoki jungjunga bilemdangdir, asenok tsürabur yimkümertemi mesemtetba kimong nung dang lia alu tasenba tetezüji, ano asenok tsüraburtem libaliro nungi tatsükata tejakleni renloka maoa ta angatettsü. Tetezüji, tsüraburi yatetba kimongji menendokang ta ashirba masü saka tsüraburtem mapang libaliro aser inyaksangshi nungi asenoka terabo temetetba küma terenlok sayutsüla ta angatetdaktsüner. Ashiko, asen tsürabur mapang lepteptsüngtep mali asübo, kecha tarendak aser tetsübu melii tsümar yimküm amato, pei pei lu ayimdak jokshia jokshia alu aser kimong mesemteter lila ta bilemer. Ajisüaka, par mapang tensa kenyongi balaka, külemi yim ka kümtetter liaka, iba jagia temulung anisüngzüka tesünep nung alitsü makokba lepteptsüngtep putu asünungji, yim süngküm agi mitsa kümer külemi alitsübaji nüngdaka liasü. Iba amaji tenem tekong bushia dang asen tsüraburtemi yim aküm aser yangji lia ongpang lu aser azüng lu yima ali aser ibaji asen sobaliba aküm. Iba sobaliba nung jagi asenok ano tajung küma tejakleni renloka mouteti timatemer. Iba jagi asenoki tangar tejakleni aoba mangur aser peii inyakba agi pei boka mesüngtet pei temeten dena ayoktsüsa alir. Iba tiaji kodang bilemdangdir, asenok alidak aser asen akhi sobaliba nungi mepilatetba ajanga asensasa asen yimteta moutet timatemer ta angatettsü. Tanü putu nung shibaibo anogo shia yimtak nungi azünglui tasentsü ? Shibaibo yimtak nisung den külemi shiruru metsüa alitsü ? Itemji kodang bilemdangdir, town nung government mapa inyaker aser business tapu balala inyaka alirtem dak alaka, asenok yimtak alir aser town nung alir asüyonga kecha meinyaki alirtembo asen alu ayimdak mesüra mapa inyakdak kimong tajung mesemteta talitsü ki yanglur , yangji lia mapa inyaktsüla. Tanü putu nung aluyimba tsütsü asenok asoshi temelenshi ka nüngdakbaji aji asütsü. Iba temelenshiba yimya nung asenoki alu yima mali tashi, asenok inyakba agi asenok tebok masüngtsü. Asenoki nashi, nabong, ak aser an metsüa linür, saka kodaser tangar den külemi kishi nentepa yur asen ki anasa shiruru metsütsü ? Ibaji kodang shisadangdir, asen kija oagi alumang tuluka mesemteta yangji ki sür, kiset shirurutemji farm küma metsüa alitsübajiang jangratemtsüka asütsü ta asenoki angatettsü. Aji oda kodang, asenok alu nung lia alu yimdir, anüngdang anü tatsük nung meinyakyonga, anepdang aser nikongdang anü tanük mapang inyakba agi alu tulu yimteta takar küma alitsü. Atangji, tanü asüng nisung karbo yimtak nungi pilar süngjanglu yima yangji aliba angur aser ano karbo yimtak nungi pilar tesem tajung tesadem atsübanga yur ak aser an metsüba angur. Iba amaji kodang asenoki yim among adena oagi alu nung lia alu tapu balala inyaktsü tenzükdir, aji asenoka tsürabur putu nungi tanü putui ayaok tenzüker asütsü. Joko, tanü asüng yim tasen akümba yabo akhi tsürabur yimküm yimya nung masü saka alu inyaka alitsü nükjidong nung, jokshia jokshia asüyonga, pei lu nung pei ki süa alitsü tenzüktsüla. Atangji, asenok lipok aser ayak mesamatsü asoshi asenoki asen tetsü oshi mesendoki sapua jembitsü, asen otsü aser asen ken aser yartsüngsang mamadoktsü. Tanu putu dak apet sentong yanglua tsürabur mapang nungi monga aruba benjongbentsü amongtsü. Itemji asen senmang akümtsü. Item dakji alaka, asenok yimtak kishinentepa aliba sobaliba aser yimtak lia dang ongpang lu aser azüng lu ayimba sobalibatem endoker, tangatetba aser nükjidong tuluba nung , joko tangbo, alu nung lia alu ayimtsü aser mapa inyakdak lia mapa inyaktsü sobaliba tasen ka tenzüka, asenoka tejakleni ao tenzüktsüsa ajungshiteptsüla aser tajungshirtemi anir tanü putu aluyimba maparentemji memenui tenzüktsü junger. Iba jagi dang asenoki asen lima nung aliba temoatsütem agitettsü aser asen lima nung asen temeten shinga danga meyoki asen mapa, asen taküm aser lima agi asensasa asen nümadangteta alitsü.