Mapa inyaktsü angazükba

Asen lima nung mapa inyaker meinyakma lir saka asenoki mapa inyak mashiba agi mapa maka ama bilema kazür. Ibaji tapayutsüka lir. Atangji, mapa inyak mashibaji mapa meinyaknüba agi dangbo masü saka tangazükdak maka aser  tesayura mali ta asüba timtem ajanga lir. Atangji, tanü putu nung adokba mapatem ya asen sobaliba dak maketba mapatem dang asünungji asenok dang kari mesayura asenoki meinyaktettsü. Kiojen yangluba nunga tanü asüng joko asen tsüraburtem mapang asüba ama süra ki asür masü yin, lisem aser longru (bricks) dang amshia asür asünungji asenok aikati mangazüktetter. Aji oda, asen lima nung yimtsüng aser jila na prongla nung kisü manener saka asenoki meinyaktetter asünungji asenok kazüdang tsümartem nübo raktepa südaktsür. Iba kasaji asen lima nung süoshisa süoshi arrür saka asenoki marütetter, anungji asenok kazüdang tsümartem nem sen dalang agütsür arüdaktsür. Asen lima nung chiyongdak dasüng lapoka lir saka asenoki soruchiok mashi anungji asenok kazüdang tsümartem soruchioker aser parnok nem sen agütsür parnoki soruchiokbaji chiyonger. Item ama mesükba mapa aika lir saka asenoki inyak mashiba agi asenok mapa maka timatemer. Tanü asüngbo ku mejepba mapa kija inyak nunga kibong mesüteta jangratema alitsüba putu lir saka asenoki kanji amshia ku mejep mashi, kechiyong ibaji asenok sobaliba nung mali asü. Iba amaji, asenoki linüyonga melinüyonga tanübo asenok ajak ya tangar sobaliba nung alir, kechiyong asenok sobaliba dang nungibo maparen aika nung tangar sobaliba tajungba liasü. Aji oda, putu melentepa aodang asenok shisa tenük saaka tangar dang nungi sobaliba tajung ajizüka libalirudang, sobaliba tasen dak aketba mapa tasentemji angazüka inyaktsübaji kanga tongtibang kümogo. Tanü asenok timatemba ya tangar sobaliba tasen ajizüka benshir saka sobaliba tasen dak aketba mapabo kata inyak mashi ta asüba ajanga asenok timatemer. Iba timtem nungi asenoksasa jenbutettsüba lenmang ka dang lir, ibaji asenoki mapa inyak metettsüla. Aji oda,  tanübo asenok rongnung tazüngertema tazünger yari aser mazüngertema pei yaribo senotsü ajangzükteta liettsüsa mapa angazükdak ishikabo lir Item rongnung sü arürba mapa ya asütsü. Ano, iba dang nung jagi tenüngdakba mapa inyakertem nüngdakba mapa kaji soruchiokba ya lir. Tanü putu nungbo chiyongba ya tebok asüngtsü atema kija masü saka alima kin tapu balalai chiyongba chiyongtsütem awazüa pelatepa chiyongtepba loktiliba sobaliba ka kümogo. Anungji, asenoki aiben India nungertemi awazüba yimya nung asoba  aon mesüra China nungertemi achiba chiyongtsütemang kanga sapua achir. Ajisüaka asenoki itemji awazü mashi, anungji sen aser mapang endoka hotel nung oa chiyonger. Ano, asenoki item chiyongtsütemji yanglu mashiba ajanga takoksa kaji tsümartemi inyakba ama hotel lapoka meinyaktetter. Tanübo asenok tia ajung item chiyongtsütem yanglu ashitsüsa tangazükdak karbo lapoka lir. Item tangazükdak tesem rongnung Dimapur nung lapoka aliba Global Open University ya asütsü. Iba Univeristy nung Hotel Management indang sayudang chiyongtsü tapu balala yanglutsü sayuba den külemi hotel nung chiyongtsü anganütsü, yipten renemtsü aser  tangar den jembishinütsüba yimyatem ajak sayur. Itemji tanü asüng lanurtem ajak asoshi kanga tongtibang lir. Tanü asüng lanurtem kibong akümdang peisasa süngo yanglua mejemtet kibong akümer iba jagi aiben balalula adoker. Iba Univeristy nung Hotel Management course ya class 12 ajangtettertem asoshi küm asem agir. Itemjibo asen lima nung dang masü saka tanga bendang limatem nunga mapa melamelaa angur. Ano, soruchiok kija angazüktsü atemabo class 8 tashi azüngertem asoshia ita asem course ka agütsür. Iba ama mapa inyak angazüker peisasa hotel lapoka inyaktsü akok mesüra tangar hotel tajung nung inyaktsüa akok. Atangji, tanü kibong karbo pei kidang China nunger chiyongtsü ‘momo’ kija yanglua hotel-tem nem agütsüba agi anisüngzüka aliba kibingtema lir. Item ajakji putu den apet mapa inyak angazüka inyakba ajanga lir.