Mapa inyaktsü sayur

Nagaland nung mapa inyakner saka mapa mangu kazür lanur aika lir. Itemji kar class ter tashia mazüng aser karbo ano talangka zünger saka parnok tebilemtsüjibo kasasa, kechiyong parnok tebilemtsüji mapa manguba tebilemtsü lir. Iba tebilemtsü ya mekoktet yamai küm ter yutsü nungbo Nagaland nung mapa inyaker chiyonger dang nungibo mapa meinyak chiyonger teimba asütsü, anungji asen lima ya auer aser ashir agi asüngtsü. Atangji, tanüa kasa tebilemtsüji ajurudagi saka tanü tashi nung ajuruba tebilemtsü yabo lokti aser yimteni azüoktetter, kechiyong ashir-auertemji aikabo masü. Aji oda, asen lima nung nisung tajungertem dang nungibo tamajungertem tiemba makümtsüsa tangsa dang asenok  lokti aser yimteni rongdak nüngdaksa inyaktsüla mapa kar lir. Item rongdak mapatem rongnung tongtibangbaji mapa teinyaktsü maka kazür lanurtem nem mapa agütsütsüba tebilemtsü ya asütsü. Atangji, asen lima nung lanurtem kar sorkar mapai irrbo tanüngba lanurtem ajak kidang kazüba tebilemtsü ya bushidangra, lanurtem dang mapa inyaktsü lenmang sayur maliba ajanga lir. Tanü asenok kaketreju nung angazükba yabo mapa inyaktsü angazüker masü saka tangar mapa inyakertemi inyakba indang jembitsü aser zülutsü angazüker. Anungji, asenoki temetetbo aika meteta lir saka asenoki metetbaji mapa inyaktsüba yimya metet masü saka tangar taküm otsü aser tangari inyaktetba mapatem indang metetba lir. Atangji, itemjia temetetter saka asen lima asoshi tenüngdaktibajibo tangari inyaktetba mapatem indang metetba purtem masü saka asen lima nung nüngdakba mapa inyaktettertem nüngdaker. Aji oda, item nüngdakji bushiteta Nagaland nung lapoka aliba school-tem nungi tenzüker Nagaland University tashi nung sayutsüla. Naga nunger lanurtembo ajak mapa inyaker asütsüsa school nung alidangyongi mapa inyak sayutsüla. Tang Assam Rifles purtemi tesem balala nung Naga nunger lanurtem dang mapa inyak sayuba ya danga ajizüka Nagaland sorkar kübok department balala nung ketdangsertemi sayutsüla. Naga yimten tsütsü bilemdangdang Assam Rifles purtem dang nungi teyari kecha maginer. Ajisüaka, parnokiang ano meyiper asenok dang taküm lia aotsü asoshi mapa inyak sayur. Tang Ghaspani nung Assam Rifles purtemi Naga nunger lanur parnok 40 dang lenmang yangludang amshiba road roller, tipper truck aser ali tua nungdokba gari ( earth excavator) anishitsü sayuba den ano Wokha nunga aluyimertem dang aonsutsü lu, naro lu aser süngjang lu ayimtsü asoshi sayuba ajanga Naga nunger lanurtem aika mapa ngua anisüngzüka alitsü imlar. Item ama mapaji state sorkari district shia nung lanurtem dang sayu asübo lanurtem mapa teinyaktsü maka mekazüdokla ta bilemer. Aji oda, sorkari lanurtem dang gari anishitsü mesüra hotel lapoktsü asoshi chiyongtsü yangluba yimya kija sayu nunga iba jagi lanur noklang aika mapa angutsü. Ibaji dang masü saka tanü lima ya electronic lima lir, anungji electronic oset yangluba indang aser kidang light enoktsüba mapatem ajak state sorkari sayutsüla. Aji oda, power department purtemi lanurtem dang kidang light enokba yimya  sayutsü, Youth Resources purtemi alima nung nübortem nüngdakba agütsütettsü asoshi lanurtem dang mapa inyak sayutsü, Industry department purtemi electronic oset tapu balala yanglu angazüktsü asoshi lanurtem kar training-i yoktsü, Agriculture, Horticulture, Land Resources, Fishery aser Irrigation purtemi lanurtem dang aluyimtsü sayutsü, Mechanical aser PWD purtemi lanurtem dang lenmang yangludang amshiba gari amshi sayutsü aser transport department-i gari tulu tila ajak anishi sayutsü ta state sorkar kübok aliba department-tem teinyaktsü mapa kecha maka ta mekazüi lanurtem nem mapa inyak sayur department-tem kümadoktsüla. Atangji, anogo shia office mapai aotsüla, iba atemaji ita sen lir aser pension achir, saka mapa teinyaktsü kecha maka anogo piyong office nung amentsübaji mapa tasak aser tezüdangtsüka. Iba amaji külen lanurtem mapa mangu kidang kazüdoker aser ano külen tsüraburtem mapa teinyaktsü maka office nung kazüdoker ta masütsü atema, tsüraburtemi pei  kidang lanurtem dang mapa inyak sayutsüla. Iba jagi dang asen lima aser nübortem azükarutsü.