Mapa junga reprangtsüla

Government mapa nung kiojen aser lenmang yanglubatem ya junga yanglutsü asoshi teinyaker contractor-tem khuret dang masü saka department nung ketdangsertem den nübortem ajak kasasa khuret lir. Government-i koba mapa inyakdir inyakaka nübortem sen agi nübortem asoshi inyaker, anungji government-i terenlok mapatem inyakba nungji nübortemi kibur küma jungjunga reprangshima inyakdaktsütsüla. Tatishitsü tajung kaji, tang Mon district kübok Tapi len National Highway 702 nung black topping aoba mapa kanga mejungi inyakba nübortemi puteta yimjak nung metetdaktsüba ajanga National Highways minister Wb.Y.Patton dena tsüngdong oagi reprangdangbaji asütsü. Mapa ajak nung kechikoma long, lisem aser yin agitsü itemji jungjunga lateta yuja lir. Ano, lenmang yangluba nunga lenmangji kobatetka aser blacktopping-jia koma aser kechi tashi telongi ia melema alemtsü, kilentsü koma toktsütsü, item ajakji tasazük agüja lir. Aji oda, mapa yari sen lemzükja lir, anungji nübortemi department office nung asüngdanga itemji metettsüla. Kibur ser nung kibur memesük lira kidang kiliria dena mezüngmeshiba ama, asenok nübortemi asenok asoshi inyaktsüba mapatem indang temeteta kecha memetet aser temulunga magütsür ta süra tangar teinyakertemibo kiburtem dang nungi temulung magütsüba inyaktsü. Atangji, kechi contract mapa inyakdir inyakaka tajangzük angutsü asoshi inyaker, anungji inyakertemjia mapa inyakba yari tajangzük angutsüla. Ajisüaka, mapa inyaktsüba sen nungi noklang nung tesadang kabo agiadoker, tesadang agidang mashimashi inyaka toktsütsü bilemra, teinyakertemji nübortem memeimba contractor aser ketdangsertem asütsü. Atangji, asen lima nungbo sen ajak agizüka agir mapa meinyakba otsüa aika lir aser ano karibo noklang nung shilem 20 mesüra 30 agidang mapa inyaker, ibayongji mapa majunger aser küm mesüitemdangyongi raksaa adoker. Mapa inyakba ajak nung department nungi engineer aser overseer lir aser parnok mapaji mapa inyakbatemji jungjunga repranga shitak inyakdaktsütsübaji lir. Ajisüaka, tanü Tapi nung atalokba amaji, department nung mapa repranger ketdangsertema mali ama mapa inyakertemi mashimashi inyaka aobaji Nagaland asoshi taoksatsü, takoksatsü aser tebilemdangtsü khuret tuluka asütsü. Item  mapatemji jungjunga repranga inyakdaktsütsü asoshi nübortemi (aji government) ita sen den gari dena agütsür, saka mapabo mashimashi inyakdaktsür ta süra yangji tasüngdangba tuluka adoker. Shitakba agibo contractor den ketdangsertemji dena temerenshi angutsüla. Asenok kechi tenzükba mapa nung südir süaka alima aser nübortem meimba shisatsü lia inyaktsüla. Alima aser nübortem memeimi mozü kidang doctor inyak nung, school nung tesayur inyak nung, terenlok mapatem inyakba nung engineer, overseer aser contract inyak nung koma asütsü ? Item jagibo nisung asüyonga sen dang ngura ojang ta bilemtsü, school tanurtem tajung mekümdaktsüyonga ita sen ngura ojang ta bilemtsüla aser kiojen aser gari lenmang majungyonga ni dang ajangzükra, kecha masü ta bilemtsü. Asenok asoshi kangasa tia majung tanü asen lima nung item ama alima aser nübortem dang nungibo sen-ang temeimba meima inyakertem jenti lir. Iba jagi senbo aika endoker saka alimabo tamajungba akümer. Asen lima aser nübortem meimra terenlok mapa junga meinyaktettsüsa shingaia ochimashi mapa meinyaktsüla. Terenlok mapa inyakba ajanga asenbo tajangzük angu saka mapabo junga meinyak ta süra ibajibo terenlok mapa inyakba masü saka nübortem ashioktsüba mapa-ang ka asütsü. Joko, tanübo asenok ajak temetetba putu nung alir asünungji, nübortema temetetter ama wainshin meteta alitsüla aser yimsüsür, ketdangser aser inyakertem ajaki nübortem akümtsübua meinyakba rongsen agitsü memerangi, inyaker anguba rongsen agi alima yanglutsü aser nübortem talila awaloka yaritsüang bilema inyaktsüla.