Mapa ka nung tesem ana nung raratsüsa tashi mali: IAF

New Delhi, March 10 (Agencies): Brihostibarnü Indian Air Force (IAF)-i Pakistan aser China naprong den mapang ka nung dang anünglen nung raratsüsa tashi mali, ta shiogo.

IAF-i 5th generation fighter aircraft aser 36 Rafales dak alia nüngdaker, ta shiogo.

IAF indang Squadron tashiji 42 lemzükja lir ajisüaka tan 33 tashi ajema alur aliba mapang ka nung IAF-i item osang metetdaktsür.

Squadron 33 rongnung timbaka linük indang tejaklen raraba tayimtsü, Russian origin Su-30 jets lir. Ajisüaka aircraft service ratio ji shilem 55 shi dang lir. Iba tetezü aircraft shilem 100 nungi shilem 55 dang amshitettsüsa lir.

New Delhi nung osangbenertem senden nung jembidang IAF Vice Chief, Air Marshal B S Dhanoa-i, “Tesem ana nung anünglen nungi raratsüsa tayimtsü peria mali. Tesem ana nung raratsü nüngdaker. Ajisüaka item jagi peritsü asü (?) Masü. Squadrons ajema kümdar,” ta ashi.

Pa dang, asüng rara adok nunga IAF-i tesem ana nung raratettsü asü (?) ta asüngdanga liasü.

IAF osang ka ajanga ashiba agi, taruba küm ishika tashi IAF-i tesem ana nung khenyongi raratsü makoktsü.

Kargil rara nung shilem agir Dhanoa-isa, “Onoki onok tebilemtsütem sorkar nem metetdaktsüogo. Sorkaria iba tebilemtsü agizükogo, iba yongji sorkari G2G nung ajemdaker aircraft 36 (Rafale) alitsü atema tezüngzüktep agi, kechiyong squadron ajema akumba ajanga tang rongtak nüngdakji parnoki ajitet,” ta ashi.

Rafales 36 dak alia ano Medium Multi Role Combat Aircraft (MMRCA) type aircraft tali nüngdaker asü ta asüngdangba langzüdang pai, au ta langzüa, “Lenla ajaklen nungi bushidar. Alitsü tezüngzüktep agia aliba Rafles 36 dang nungi tali MMRCA class aircraft nüngdaker. Ibaji onok aser sorkar na dak keta lir. Onok (IAF & sorkar) ajaki ibaji lemtettsüla,” ta ashi.

IAF Deputy Chief, Air Marshal R K S Bhadauria-ia, Rafale fighter jets 36 alizükba sülen ang ano tayimtsü tali alitsü atema telemtetba agitsü, ta ashi.