Mapa kera meinyakba ajanga contractor tem anema GMC-i ken o agütsü

Guwahati, April 23 (Agencies): Tzümetsüng nungi nokdangtsü asoshi tenzükba maparen kera meinyakba atema contractor aser engineer tem anema Guwahati Municipal Council (GMC) ajanga ken o agütsü.
Yimti nung tzümetsüng adokba nokdangtsü asoshi mapa meilongi inyakba ajanga iba tesem nung alirtemi ashishitep aser iba ajanga GMC-i iba sentong ya inyaktsüsa aküm. Contractor, Dewan Haidar Ali anema iba ken o ya Latasil police station nung agütsü. Sajiya Begum aser Pankaj Deka anema ashishitep ken o ana agütsüogo. GMC nung engineer Paresh Thakuria ya khen asoshi mapa nungi anentsü aser Akbar Ali dang telangzüba tajung agütsütsü asoshi tetuyuba agütsüogo.
“Yimti nung tzü aoba lenmangtem meriktsü asoshi mapang tongja tongogo. Iba tesem nung mapa inyakbatem onoki repranga arudagi. Nisung kari danga pei mapa nung temolung magütsüba ngura tapet temerenshi agütsütsü. Ibai tetenzüker dang lir,” ta mayur, Mrigen Sarania-i osangbener dang ashi.
Contractor temi GMC commissioner, Monalisa Goswami ajurogo aser mapa tekeraba nung renemtsü asoshi nangzükogo.
Yimti nung tzümetsüng adokba nokdangtsü aser tzü aoba lenmangtem meriktetba maparen inyaktsü asoshi contractor 30 nem mapa agüja lir. Iba project jenjang ya sen crore 38 lir, ta mayor-i ashi.
“Ni tamalen ashiba ama mapatem ya ka khen ka ta inyakyonga aor. Anil Nagar aser Nabin Ngar ama tsünglanglen aliba tesemtem nung mapa renemba ajanga item tesemtem nung aliba nüburtem tajangzük angutsü,” ta Sarania-i ashi.
Tzü lenmang junga melapoktsüba ajanga item tesemtem nung aliba nüburtem taoba hopta nung tzümetsüng agi kongshia lir. “Onok teti tzümetsüng tsübua alir. GMC aser yimti ketdangsertemi maparen kar ajanga onok nem teyari agütsütsü imlar,” ta Anil Nagar nung alir, Rakesh Das-i osangbener dang ashi.