Mapa meinyakba cooperatives tem shibangtsütsü: Akangjongshi

Kohima, Chiteni/July 06 (TYO): Nagaland indang cooperative ecosystem tashi itshidaktsütsü atema tongtipang mera ka ama, Department of Cooperation ajanga October 2025 tashinung mapa meinyakba cooperative society 3,000 shi indang registration agientsütsü, ta Deputy Registrar, Cooperative Society, Akangjongshi-i sangdong.

Kohima nung Honibarnü International Cooperation Day amungdang, Nagaland nung registered cooperative societies 8,000 dak tema liaka shilem 73 jungnüa inyaksangshi kecha mali mesüra mapa meinyaker, koba ajanga sector inyakyim nung timtem jenti ajuru, ta Akangjongshi-i ashi.

“Onoki October ita tashinung item mapa meinyakba society indang registration agienja inyakyim bentettsü nükjidong lir,” ta pai ashi.

2021 küm Union Ministry of Cooperation lapokba sülen central sorkari mangdang tulu yur digitisation initiatives tenzük, ta pai ashi.

National Cooperative Database (NCD) portal yagi primary nungi multi-state levels tashi cooperative societies ajunga indang data ka kuma lungjemdaktsür, anungji stakeholders aser policymakers temi osang tejangja mela-mela agiteter.

Primary Agricultural Credit Societies (PACS) computerisation asüba nükjidong ya data management, transparency aser audit standards tajungba kumdaktsütsü nükjidong nung lir, ta pai ashi.

ERCS (e-Registrar of Cooperative Societies) platform tenzükba ya paper mamshitsü, digital ecosystem asoshi lir aser society temi district offices tonga moaka online ajanga registration asoshi apply süteter, ta ashi.

Item modernisation inyakyim nung takok anguba nung intensive capacity-building programmes nüngdaker, ta Deputy Registrar ajanga ashi.

Tesüiba ita trok tsüngta department-i cooperative societies aser departmental staff tem asoshi training sentong balala ayongzüka agiogo, aser ibaji ajanga operational efficiency aser technical skills kanga tajungba kumdaktsü.

Temelenshi tulu kaji akhi mapang amshiba PACS nungi Multi-Purpose PACS (MPACS) dangi melenba ya lir. State nung model by-laws tasen amshi tenzükogo aser 2025 küm tatem tashinung targeted rural areas shilem 50 awajemtsü nükjidong lir ta ashi.

Registration costs aser by-law expenses ya NABARD ajanga senotsü teyari agütsüba nungi Nagaland State Cooperative Bank ajanga agütsütsü.

Yimdaklir tem district offices tonga moi registration maparen renemba nung yimdaklir yaritsü asoshi resource personnel tem yoktsü, ta Akangjongshi-i ashi.

International Year of Cooperatives den lirumedemka, department-ia state tesem ajunga nung plantation drives ayongzüka Forest Department teyari nung district shia süngdong 500 dak tema temogo. Nagaland House, New Delhi nunga süngdong atemba sentong ka ayongzüka liasü.

Government of India-i 2047 tashinung Viksit Bharat akumtsü mangdang yua aliba nung takok angutsü asoshi cooperative sector ya tongtipang lir. “India nung yimdak-yimtsüng temelenshi aser lenla ajaklen aintsü asoshi tarutsü nükla ya cooperative base tashi aitba nung amendaka lir,” ta pai ashi.

Paisa departments, stakeholders aser nüburtem dang iba movement nung shilem agia yariteptsü ayongzüka liasü.