Mapa meranga inyakba konang

~Mrs. MEYISONGLA
Rtd DY Director, Nursing Nagaland. Kohima.

Küm ter (10) shi ogo, ozü kidangi U.P nunger mesüker aso tulu, tar talang sür sentsü tera nakrem nakremer ka juli (bag) tejen tuluka retreta sünga oshir aji pa tapupang achichilen yiloka bener, ano tanga juli ka sünga abelen agi amer aru. Pa tejak aser tula ajak asentzü agi metenjemer, kangasa aniseter ta ni ajitet, yakta menden agüja mendaktsür tzü tajemtsü agütsü. Tzüji jemer pai pa juliji lapoka kaket tapu balala aika verandahji süngnüa agiteta sayu. Pai jungli O beta beta aser kanga kara kara jembipaji ni kanga jungabo mangatet. Saka ni kakettemji ka khen ka khen ta lushia reprang, Nia kaketji pezü pungoka agiteta ali. Pa kanga pela. Ano pai kü kaketa tayoktsü kar bener ao. Pai kaket yoktsütsü agizükba aser kaket yoker sen agütsütepdang züluokba register tuluka nung nisung shiaji page balala nung zülur kaket kibur nemji sign südaktsürang senji agüja ayur. Yangji pa dak molung malemtsü kecha mali. Ni pa dang tebu na tenüng shiba ? kechi inyaker ? aser koyimer ? ta asüngdang. Ni Mr.Imkumzükba, Imnasüng-bar japaso aser Asangma nunger. Ni B.Th aser B.D zünger Christian literature ministry worker ta ashi, na kong alir ta ni asüngdang. Lower P.W.D, Kohima nung alir ta langzü. Iba sülenbo mapang shia pa ozü kidangi arur, aser tangsa tajungba ni pai jembibaji angateter.
Kaket zülurtemi timtem aika agia kaket zülur, sen aika endoka kaket menünger. Kaket zülur tebilemtsüji kaket ayoktsübaji lir. Saka adianu kümzükbai kaket yoktsübajagi kaket zülur timtem khuret pongpatsür, aser kaket alirtema yarir. Ano pa anibelema senzübajagi pa pocket money angur. Aji taa ka masü asübo pa mapa makai senzüalila mesüra sen nung timtem angutsü. Yamaji tanga lima nungbo part time student temi mesüra azünga alir aiür asangurtemi kaket yoka senzüba aika lir. Tsürapur dang sen memeshir.
Zünger mapa bushir ka office peon atema firm tulu ka nung interview agütsü. Manager jagi pa tendangtsü atema, table aser chair meyutsü mapa agütsü. Aser manager-ba jagi tanupusang dangji kü nem nü indang e-mail address agüjang, ni nü dangi application form yoktsü ta ashi.
Asangurba jagi langzüa ni e-mail aser computer mali ta ashi, itemji makara na taküm maliba den saku. Iba ama nisungbo ni job magütsütettsü ta shir yok, pa ket nung sen noklang pungu (Rs 500) dang liasü, pai bilemdang aser bazari orr Rs 500 jagi tomato kg 10 ali, aser aji ki ki shia yoka senzü. Gonda ana nung ibaji yokma. Ano iba sen jagi tomatoji alia anaben asemben yokma aser sen ajak agi sen 4000 yokzük. Pai bilem yamai dangsa ayok nunga tepok sünga litettsü ta pai bilem. Yamaji süa mapang tatsüka nung pai nashi gari ka ali. Iba sülen gari tapu balala ana asem ali.
Küm 5 sülen America nung chiyongtsü ayoker tulutiba aküm. Ali tulu alia ki tajung sür jangratema ali. Parnok businessmen sentepaa meeting nung discussion agidang pa dang e-mail asüngdang. Pai ashi, ni e-mail maka, na e-mail malisür nai yimli tuluka yangertetogo (build an empire). Na e-mail ji ali asübo tang ya na koma lila? Iba mapangto kü ket nung e-mail ali asübo ni tangya office boy mapa inyaka lila ta pai langzü.
Reflection:
Asenoki asenji koma ka aginür yamaji yanglur. Asenoki teti-a tajung dang bilemtsüla aser tamakok nem mekokdaktsütsüla. Meimchir ajaki tamakok angur, tesama ajurur, aibelener alanger. Shibai alangdangji mejanga kazüdir paji tamakoker, saka shibai alangba nungi saker jaja aoer aser tasü itshir, paji takoker taküm lir.
Yerimia 33:3. Kü dang ja-ang aser ni nü dang langzütsü aser miim mapa tulu koba nai memeteti ali nü dang ashitsü.
Lanur mapa bushirtemi tatishitsü tulu agitsü aser parnok ajongmesotsü atema asen nüburtemi mapa meranga inyaker. Mr. Imkümzükba, Asangma nem tenüngsang agütsütsü langa lir ama nibo bilemer. Pa ama ka nem Governor award/certificate agütsütsü lenmang teyutep nunga koma süla ta kü bilemba ka shidanger.