Mapa Meranga Inyakdi

–  Mrs. Sütsüngsola,  Mongsenyimti.

Tanü alima nung mapa manguba tebilemtsü kanga sashia jembir. Tongtipangsa kibong aika nung zünger mapa mangu aika lir aser karbo school-a mezüngtet kecha mesüteti aika lir. Tanü asen lima tebilemtsü tulutiba rongnung iba ya ka asütsü. Saka nibo shiner “Asen tsüngdang mapa teinyaktsü jenti lir”.
Ni yimdak alir kibong ka lir. Saka Tsüngremi anema toktsü nung künü danga azünga melii ni koktetba mapa meranga inyaker aser jangratema pelaseta alir. Inyakba nung takok aser temoatsü ngua yimer aser pur medemertemi ni koma kechi mapa inyaker alima dang sangdongang, aika tajangzük angutsü ta ajungshi nung, kar danga temoatsü ngura ta ni inyakba tongmelang agi lemsateper.
Tanü asen lima aluyimba mapa asadangra asen lima tekong lu (tsük lu) ayimba nung tajangzük maliba angur. Küm piyong alu inyaker tsük agi ki atong nung, tsük tin ka nung Rs. 400-600/- shi atoker. Anungji nibo lisa tajung dak tsük tera dang yoker aser tanüngba nung aonsotsü dang yoker.
2017 küm alu nung tsük tin ka dang yok aser tanüngba alumang ajak nung aonsotsü tapu balala yok. Iba nung züsenteta yoktetba yamai liasü.
1. Lasüng -10000/- 2. Naba-7000/-
3. Menti-12000/- 4. Likok- 8000/-
5. Züngyi -75000/- 6. Chubi-19000/-
Iba den shishilembaba yamai inyaker: Yimer dang aonsotsü alizüker aser bazaar balala nung bener oa ayoker. Ni motetra oset dang yoker. Aonsotsü yokzükba sen agi yimdak manguba aonsotsü aser oset bener arur aser item oset sen agi maliteter dang aonsotsü agi melenteper. Ibaji yimer asoshi kanga tajung lir. Yamaji government job sa meliaka meranga inyakba nung küm piyong kecha mozü mamshi adokba chiyongtsü chir pur medemer, kiyonger aser kinunger den lemsatepa chir rongsen anüngzüker.
Anungji makamait, sensakba, mapa manguba indang jembiba ya Laishiba nung Haggar-i pei tsüngdang tzübu lir iba tzübu mangu pei chir aya tzüra agi asüba repranga melitet toktsür aoba den saku lir. Anungji asenok saksalemdi. Haggar ama mesüli. Tsüngrem dang shisatsü meshir mapa meranga inyakdi ta ayongzüker.
Lai nung ashir, MAPA MEINYAKRA TECHIYINGDAKTSÜ (2Tes. 3:10)