Mapa meranga inyaker mezüngmeshi tesü: DUCCF

Dimapur, Luroi/August 29 (TYO): Dimapur Urban Council Chairmen Federation (DUCCF) ajanga sorkar dang Nagaland RMSA Teachers’ Association (NRMSTA) 2016 batch-i akhangba angadanga parnoki akhangba ama inyaktsü ayongzüka liasü.

RMSA kübok 2016 küm shimba tesayurtem indang itasen soita ayuba ya tim masü aser Court mezüngmeshiba lir, shirnok Gauhati High Court indang division bench ajanga March 16, 2022 nung medentsür aser Supreme Court-ia May 20, 2025 nung kasa temeden agüja lir.

Ibai tesayurtem bendanga agütsür meranga inyakba mezüngmeshi lir, shirnoki pei asoshi mebilemi meranga tenzüka arur. Parnok ‘pen down strike’ tenzükba ajanga state nung government schools 133 aser yangi kaketshir meyirijang aika dak kongshitsü, shirnok tarutsü nükla lir, ta DUCCF ajanga ashi.

Mapa shidak inyakba sorkar employees nem sorkari taa shidak agütsütsüla. Kasa mapa inyaker kar nem taa tajemba aser kar nung timba magütsütsüla.

Ibai tashiyim amshiba maparen ka lir, kechiaser parnoki memulungseti iba mera ya agitsüsa akumer.

Legal tsütsü nungi benteter aliba ya mapa kuma inyaktsüla aser judiciary mezüngmeshi masütsüla, ta DUCCF sangdong ajanga ashi.

NRMSTA 2016 batch puri parnok mapa nung aniokba 2016 küm nungi tenzüka itasen aser service benefits shidak agüja 2010-13 SSA-RMSA tesayur den sako ROP 2017 pay scale den annual incrementa agütsütsü akhanger. Ano April 2025 nungi parnok nem itasen magütsüba meshir.