Mapa nungi anentsüba

Government mapa nung ochimashiba mesüra mapa makokba puteta center government-i taoba küm pongo tsüngda Group A nung inyaker nisung 125 aser Group B nung inyaker nisung 187 mapa nungi anentsüba osang yakanü Lok sabha nung metetdaktsüba jagi, government-i ochimashir aser mapa makoker anema ozüng ya tamshibo amshidar ta sayur. Atangji, government nung dang masü saka kibong aser loktiliba maparentem nunga timtem agütsüba aser tamakok aludaktsübaji, talisa, ochimashir aser mapa inyak mashir aser makokertem ajanga adokdaktsür. Ajsüaka, asenoki aiben tali meimba agi mesüra nüngsen maginüba agi ochimashi inyakyonga odang toktsür aser mapa makok aser meinyakyonga aremzüker. Ibaji junger amai saka nisung ka taküm raksadaktsüba aser lokti liromedema tejakleni moudaktsüba timtemji yang nung jagi tenzüker. Nisung kati ochimashi mapa kanga inyaker aser nisung kati ibaji anema menokdaker, tenajj lokti asoshibo kasasa timtem takoksa bener arutsürtem asütsü. Nisung kati mapa makoker aser temulunga magütsür saka nisung kati pa mesüra laji temetongshia memetongshitsür aser temerenshia memerenshir, süra tenaji kasasa lokti aser yimten nem takoksa bener arutsürtem lir. Alima raksaba aser majungba ya nisung tamajungertemi tamajung inyakba agi masü saka nisung tajungertemi item tamajung mapatemji anema menokdakba ajanga lir. Aji oda, kodang nisung tajung aser ochishirtemi nisung tamajung aser ochimashiba mapa anema menokdaklir, nisung ajungba aser ochishiba tetezüji maka akümer. Tanü asen yimten aser lokti nung ochimashiba aser mapa nung nendaka meinyakba indang kanga jembir saka item ochimashi aser menendak inyakba mapatem anema temetongshitsütsü inyakba mapabo kanga mangur. Ochimashi agi asen lima renloka moutetter saka ochimashi mapatem anendaktsütsü asoshi inyakba mapabo mangashir. Iba jagi ochimashi mapa inyaktsü temulung ulur aser ochishia inyaktsübajiang tim masüba mapatem amato kümdaktsür. Mapabo mashi aser memetet ser nung sübokrem amshia mapai aiba mesüra kinunger adianu teyariteper aliba agi mapa ngua inyakba purtem aika lir. Office file nung oren kata zülua moutetba ketdangsertema karbo kanga timtema alitsü, iba amaji mapa inyak mashi aser mejangrar ser nung ita sen kisüng achitsü bilema government mapa nung inyakertema lir. Item jagi pei lima aser nübortem ashioktsür. Mapai ai, ita senbo achir saka mapai maor ta asüba agi asen lima tesem aika nung tanurtem aika tarutsü taküm dena raksatsüdagi. Item rongnung, talisa, school nung tesayurtem aser mozü kidang inyaktsü shimba purtem asütsü. Tanga asenoki osangkakettem nung Yimchungrü kaketshirtemi par lima nung inyaktsü shimba school tesayurtem dang aruagi mapa shitak inyaka alitsüla ta metetdaktsüba angur. Iba amaji mapang mapang shia, talisa, Nagaland anüdoklentsütsü aliba kintem nungi kaketshirtemi ola adokba angur. Ibaji government nung yimsüsür aser ketdangsertemi angashitsüla aser reprangteta tim masüba mapatemji metongshitsüla. Tanga lima nungbo senso kati osang kaket ajanga governnment-i tienyaktsü ka meinyakba agi nübortem timtemba indang yimozülur dangi shidi tatsüka zülur adok nunga, panüjisa iba depatment nung yimsüsür aser ketdangsertemi jet ta metongshitsüba angur. Joko, asenoka asen lima tajungba kümdaktsünüra asenok rongnung ochishia meinyakertem aser mapa makokertembo mapa nungi anendaktsütsüla. Item jagi asen lima rajang kümdaktsür. Asenok shingaia asen lima nung akok tashi ochimashi mapa inyaktsü aser raksaaa yutsür tanga lima nung oagi alitsü ta bilemabo meinyaki alitsü. Asenoka aser asen chirnurtema asen limabo asen lima nungsa alitsü.Iba tangatetba aser nükla nung asenoki tanü kechi mapa inyaker, aji ochishia aser nendaka inyaktsüla. Asenoki inyakba mapa nung asenoka aser asen chirnurtema nümadangtettsüsa asenoki inyaktettsüla. Iba amaji asenoki asenoksasa meinyaktetra peisasa mapa nungi anenang tajungba aser peisasa manenra government-i anentsütsüla.