Mapa renema inyaktsüla

Nagaland nung nübortem kangshiba mapa kaji government-i nübortem asoshi inyakba terenlok mapatem mapang shitak nung merenemtetba timtem ya asütsü. Government-i lenmang yanglutsü tenzüktsü saka yanglutur yutsütsü, kiojen yanglu tenzüktsü saka sütur yutsütsü, apu atem tenzüktsü saka merenemtet toktsütsü ta asüba nübortem asoshi tamakok mapatem aika Nagaland nung atalokdagi. Item ama terenlok mapatemji tetenzükbo tenzüka inyak saka mapang shitak nung merenemtet anogo atsülangba shiaji mapa jenjangji atur, anungji mapa tenzükdangbo sen crore 10 jenjang asüba mapato mapa tesadangka inyaka aodangbo kasa mapa jenjang to reprangshir crore 20 jenjang kümer asütsü. Ano tejashitsükaji, iba jagia mapabo merenemtsü saka senbo ajak amato agizüka agitsü. Iba jagi Nagaland merenloktetter aser topur majunger. Nagaland nungbo mapabo mejungi inyaktsü saka mapa merenem tashi sen jenjangbo akok tashi tupet tudakja inyaktsü tokteper amato Naga nungertemiang tamajungba aser tzümartemiang tamajungba ta inyaker. Iba ama jenjangbo aika tudaktsü aser senbo teimbaka agizüka agi saka mapabo tesadanga meinyak nemdaka toktsü ta asüba mapatem rongnung Nagaland tenemtsüng lenmang nung atemba Doyang apu ya asütsü. Tang tashi nung Nagaland Foothills Road Coordination Committee (NFHRCC) purtemi kanga meranga inyakdagi. Parnoki pei nübo aser rongsen endoka inyakba den government nung alirtem den nüngsen agia mejembi aser meinyak asübo tang inyaka aliba tashijia meinyaki lila. Iba lenmang atema ya yaküm küm mapang kabo state government dang jashiba sayua mokdangba sentonga ayongzüka agiogo. Iba amaji teinyaker aser tejajar kabo kanga anibelema maneni inyakdagi. Tanga state nung asünungbo nübortem asoshi kanga tongtibang lenmang ka yanglutsü asoshi nübortem longkak aita ayimten atatsü menüngdakla. Doyang nung asenok apu tatsüka ya atem tenzükba den külemi asenok anasa Assam nungbo apu kilometer junga atem tenzükba pibo renemer gari jajadagi. Ashiko, Nagaland yimtiba ya Mon asünungbo iba foothill lenmang ya yaktayongi National Highway küma yanglur jajaa lila. Ajisüaka, tang Nagaland yimtiba Kohima nung alirtemi talisa Mon, Longleng aser Mokokchung nung alirtem Assam ajanga senzüdang timtem aser takoksa ajuruba majangshidang, anungji memetet. Tanga Assam bandh aliba ajanga asenokbo sentong aika thitemogo, kechiyong Assam mekendoka jajatsübaji kanga tasak. Itemji asadanga kodang asenoki bilemdangdir, Foothill lenmang yabo tsükaronga contigency fund nungi asüyonga yanglutsü nüngdak ta angatettsü. Asenoki alu lenmang tenüng nungbo sen mekurui endoker aser mashimashi inyaker toktsür, saka iba ama asenok taküm mesütsüba lenmang asoshibo süoki ia mebilemer. Iba  jagi nübortem asoshi terenlok mapa merenem dang iba sen jagi pei agitsübo aika renemer alir. Joko, Nagaland nung yimsüsür aser ketdangsertemi Naga nunger asoshi rongdak nüngdak reprangteta jungjunga inyaktsü merangtsüla. Apu yanglutsü latetba sen jenjangbo tutsü aser sen-a agizüka agidaktsü saka mapa merenem ser anendangbo kecha mashi odang toktsüba government-ji kechi government asütsü ? Senbo teimba agizüka agi saka mapabo tesadanga masü inyaker anena toktsü ta asüba contractor-jia nübor meimba contractor asü, sen dang meimba contractor (?) ta asüngdanga Foothill Committee purtemi dang masü saka nübortemia bushitsüla. Joko, tang nungibo kechi mapa inyakdir inyakaka, jenjang metui, mapang shitak nung renemtsüsa department nung ketdangsertemi pei lima meima inyaktsüla  aser sen meimertemi masü saka Nagaland aser  nübortem meimer contractor-temi dang contract mapa inyaktsüla. Contract mapa inyakba ya nübortem ashiokja mapa shitak meinyaki sen agizüka agitsüba mapa ka masü saka nübortem nüngdak anepalutsüba mapa ka ta angateta inyaktsüla.