Mapa tajung inyaktsüba mapang

Tang ya Nagaland asoshi mapang tamajung ka ajurudagi. Tesem aika nung anentsü aser tzümetsüng agi kiojen raksaba dang masü saka nisung taküma dena samaogo. Asenok aika tanü boksüng dang ngua alir asünungji, anogo ka gari mesenzü nung chiyongtsü maka akümer. Ibayongji, joko tesem aika nung chiyongtsü maka akümba agi sepaitem teyari agia government-i tayimtsü nung chiyongtsü bener oa agütsütsü tenzükogo. Iba ama alima lendong timtem ajurudang, aiben asenoki yariteptsü melen government aitsütsü dang bilemer. Atangji, government nung yimsüsür aser ketdangsertemi alima ajungtsü asoshi mangdang lia inyak asü asübo tanü ajuruba timtem aika majurui nokdangtettsü koka liasü. Iba jagi timtem ajurudang ma ta tai tongloktsütsüsa akümer. Ajisüaka, tanü ama lendong timtem ajurudang, asenok mapaji government kija aitsür yutsütsübaji masü saka kodaser nübortem lendong timtem nungi aniteta tajungba jenjang nung lidaktsütsü ta bilema yariteptsübajiang tongtibangba akümer. Aji oda, asenok asoshi mapang tamajungji mapa tajung inyaknertem asoshibo mapang tajungtiba ta angateta inyaktsüla. Asenok aika dak tashimait kaji asenok dak lendong timtem agi matong tashibo asenoki tangar lendong timtem ajurur alirtem tia indang shishia mebilemer. Iba jagi yariteptsü melen aitsüteper. Atangji, yarinüyonga asenoki rongsen tulu bener len talangkati moutettsüa akok, ajisüaka asenoki asen anasa lendong timtem ajurur alirtem nem parnok nüngdak agüja yariteptsüa akok. Tang ya Nagaland nung tesem aika nung anentsü agi kiojen raksar talidak maka kibong aika lir. Ano, kibong karbo gari mesenzüba agi chiyongtsü maka aser malitet timtem nung lir. Ano, kibong kar nungbo lenmang majungba agi shirangertem mozü ki tajung bushia bener moutet timtem nung alitsü.Item ajak asoshi taitsüba masü teyari nüngdaker. Ano, iba ama nübortem timtemba mapang tezüdangtsü kaji, nisung karibo angati yariteptsü melen jangotsü nung jenjang tur ayoker. Iba ama otsü jembidang, alemli alima tanabuba rara nung nisungtem kiojen ajak raksar chiyongtsüa maka timtema aliba mapang,  France nunger aluyimer takar ka dang nisung kari tang ya na takarba akümtsü asoshi chiyongtsü nung sen tur ayoktsü mapang tajung lir ta ashidang, ” masü, tang ya ni asoshi chiyongtsü nung nübortem dang jenjang tur ayoktsüba mapang masü saka angati lema agütsütsüba mapang lir,” ta langzüba tatalokba ka bilemtetter. France nungba dak aketba shisatsüji tanü asenok daka alitsüla. Aji oda, talidak kiojen raksar timtema alirtem nem mapang tatsüka atema asüyonga, parnok nem tejenokdak aser chiyongtsü agüja anepalura, ibajiang Tsüngremi mulungba tim mapa inyaker asütsü. Atangji, tanü ama tesem tesem nung anentsü aser tzümetsüng agi nisungtem tesama aser takoksa tia ajurur alidang, kija kibongi dang masü saka arogo nungertemia arogo senpong nungi rongsen agiteta temeim agi timtemba purtem den yaritepra, iba jagi parnok shi nüngdak dang masü saka tanüla nüngdaka peridaktsür. Talisa Dimapur ama nung, tsümartem alidak lendong timtem agi tonger aliba tesemtem nung arogo tenüng nung asenok amangba purtemi parnok nüngdak bener oagi Tsüngrem temeim lemsatepra, iba ama temeim mapa ajanga parnok mulungjang nung Tsüngremi kongshitsü. Iba denji ano arogo nungertemi saruteper government nem Relief Fund nung enoksemer nüngdakba nübortem yatitsü asoshi tenla agütsüra, iba jagiang ano government nung alirtem temulungjang nung tangatetba tajung ka enoktsütsü aser timtemertem yariba mapatem tali tajungba nung inyaktsü merangtsü. Asenok meketa alima lendong timtem agi nisungtem aika talidaka maka aser chiyongtsüa maka ta timtem tia nung lir saka asenokbo chiyongtsü langpang sünga chir mechima bendena yur, tachiba tilaba aser teindokba tuluba ta ngasangatema lira, ibajibo anüng aser ali Tsüngremia magizüktettsü. Iba kasaji asenok arogo nungertema sentep ki tajung nung süoshi tajung agir Tsüngrem külembaji dang masü saka sentep ki alema orr asenoki timtemba purtem yaritsübajiang tongtibangba ta bilema Tsüngrem mapa temerangba aser tajungba inyaktsü merangtsüla. Nübortem timtema aliba mapang tamajungji temeim mapa inyaktsü asoshibo mapang tajungtiba lir.