Mapa tajungji meimchir asoshi tajangzük

–  Senti Jamir , Senior Political Leader, Dimapur.

3rd Sept. 2016 anogo nung asen Langpangkong Kaketshir Telongjem ajanga yimtsüng shia nungi putu yimsüsürtem senden ka mena (Clean election) electionji merükteta ochishia inyaktsü ta lemteta ayuba mapa ya kanga tajung ta angateter aser Langpangkong lokti lenirtem dang kanga dang pelar. Kodang asenoki mapa ka inyaktsü tenzükdir, iba mapaji merenem tashi meranga inyaker asar mapaji takok angur. Anungji ‘Clean Election’ maparen dak sendakba nükjidong nung ajemdaker tsükong nung shilem agir tanishirtemi Langpangkong yimtsüng shia oagi nüburtem dang kanga junga angateta shirabang nübortemi angatetsü aser iba jagi asen tsükong asoshi temoatsü aser tajangzük tulu bener arutsü ta imlar, aser iba mapa tajungji asen Naga lima Contituency (60) asoshi tatishitsü tulu asütsü ta imlar.
Naga nungertemi Tsüngrem amanger, Laishiba azünger, aser  sarasademer saka iba amaji melitetter aser meinyaker. Assembly Constituency  ka nung MLA mesüra Parliamentary Secretary mesüra Minister kaji area nung tebuti ka lir  aser teti nuburtem asoshi khuret abenba lenir ka asütsüla.
Tanü putu nüburtemi area nung MLA ka shimtsü asoshi kanga  dang bilemdanga meteter dang shimtetsüla. Rongsen masü saka nisung sempet  tajung aketba meteter dang paji shimtet nungbo nüburtem asoshi tajangzuk  asütsü ta angateter. Area ka nung MLA kaji kibong nung tebu ka den kasa lir,  paji neburtem asoshi teti khuret bener aliba tanishir ka asütsüla aser pai  tulur/takar/sensaker melemsai ajak den kasa liromedema litetba tanishir ka  asütsüla. Tarutsü anogo nung asenok Langpangkong Senso tajungtemi asen  tsükong tejakleni aotsü aser lanu senso tajungtem jenjang tajung nung  ajungkettsü asoshi pei constituency nung candidate shimdang azü temerük  ariabilemba temeim aketba aser pei area asoshi Government den angatettepa   development bener arutetba nisung tajung shimtettsü tanü putu asen lanurtemi  angateta inyaktsü kanga dang tongtipang ta angateter. Nisung tajungi pa dak  aketba sempet tajung sen agi yoka machir. Saka ochimashir nisungi pa sempetji sen agi yoka ajir, iba jagi pa mesüra laji nisungtemi hau ta mali kümdaktsür, aser  nuburtemi pa mesüra lar o aser mapa nungji kodanga temulung melemtetter.
Anungji, tang asen Langpangkong Senso tanishirtemi “ Clean Election” sentong  nung renemba dak ajemdaker ochi nung azükaru aser yazü nung atakatem ta  angateta Tsüngrem dang oji molungjang agi asen Langpangkong yimli yangludi  ta ayongzüker. Na Senso tajung ka ta nai metetra nü dak nungi tenük merem/tesempa/anema inyakba/ashikülak shisatsü mapa ajak endokang. Item  mapa tamajung ajak jagi nür kibong aser nü taküm dangi meyipa arulanglang.